“ეს არ იყო რუსული ჯარი, ეს იყო საბჭოთა არმია… იქ, რუსების გარდა იყვნენ უკრაინელები, ბალტიისპირელები, შუააზიელები და ა.შ.” – 9 აპრილის ტრაგედიასთან დაკავშირებით მთავრობის მეთაურის, ირაკლი კობახიძის ამ პოზიციას, კონკრეტული შეფასებებით და განმარტებებით, ეხმაურება განათლების ყოფილი მინისტრი, პოლიტიკის ექსპერტი გია ნოდია და მმართველი პარტიის პროპაგანდასთან დაკავშირებით თავის პოზიციას აფიქსირებს:
“ორიოდ დღის წინ დამოუკიდებელ ინტელექტუალობაზე პრეტენზიის მქონე ქოც-იდეოლოგი ამტკიცებდა ამას – თურმე ეს ოფიციალური მესიჯ-ბოქსის ნაწილი ყოფილა.
ასეთ პრიმიტიულ პროპაგანდასთან სერიოზული კამათი უხერხულობას ქმნის, მაგრამ მაინც საჭიროა.
საბჭოთა კავშირი იგივე რუსეთის იმპერია იყო, შესაბამისად, “რუსული ჯარი” და “საბჭოთა ჯარი” სინონიმებია. ის, რომ რუსულ/საბჭოთა ჯარში სხვადასხვა წარმომავლობის ხალხი მსახურობდა, უსულელურესი არგუმენტია – ყველა იმპერიულ ჯარში ასე იყო ყოველთვის. იქნებ უკრაინაშიც დღეს რუსული ჯარი არ იბრძვის? მასშიც უამრავი ეთნიკურად არარუსია.
იმასაც კი არ ჰქონდა თავის დროზე მნიშვნელობა, რომ “საბჭოთა” რუსული იმპერიის სათავეში ქართული (უფრო ღრმად თუ ჩავალთ, ოსური) წარმომავლობის ადამიანი იყო. იმპერია იყო რუსული.
ადრეც მითქვამს: ქოცური პროპაგანდა იდიოტებზეა გათვლილი (რაც არ ნიშნავს, რომ არ მუშაობს)“, – წერს გია ნოდია ფეისბუქის პირად გვერდზე.
