„სტრატეგია აღმაშენებლის“ პოლიტიკური საბჭოს წევრი, ნანა ტოხვაძე პოზიტიურ შეფასებებს აკეთებს საპროტესტო მოძრაობასთან დაკავშირებით:
„მჯერა, მალე ხალხის გაზაფხული მოვა, მაგრამ მანამდე ერთიანობის 114 დღე რომ შევაჯამოთ, მივხვდებით, რომ სინამდვილეში გამარჯვების ფორმულა ნაპოვნია.
მშვიდობიანმა პროტესტმა შეკრიბა ყველაზე მტკიცე, უანგარო და სანდო ადამიანები, რომლებსაც თვალდახუჭული ანდობ ქვეყნის ბედს.
დაამსხვრია მითი, რომ ორგანიზებულობა და თანმიმდევრული მოქმედება ქართველებს არ სჩვევიათ.
მსოფლიოს დაანახა კარგად გააზრებული ევროპული არჩევანი, რომელსაც არაფრის ფასად არ დათმობს უწყვეტ პროტესტში 24/7 ჩართული საზოგადოება.
თანაგრძნობის, თანადგომის და თანამებრძოლეობის ისეთი მაგალითები გააცოცხლა ჩვენს თვალწინ, წიგნები რომ დაიწერება.
აჩვენა რეჟიმის სისუსტე და ნამდვილი სახე: თუ დასჭირდა და ძალაუფლების შენარჩუნებაზე მიდგა საქმე, როგორი პირსისხლიანი და მოძალადე შეუძლია იყოს.
ხშირად ისმის კითხვა: მაინც როგორ დავამარცხოთ დიქტატორი მშვიდობიანი მეთოდით?
ვიცით, რომ დიქტატორი არ მარცხდება 1 დღეში ან 1 თვეში, მაგრამ მარცხდება, თუ საზოგადოება, პოლიტიკური აქტორები, აქტივისტები და მედია შეძლებენ ძალების გაერთიანებას გამარჯვების მიზნის გარშემო.
ჩვენი საზრუნავი მომავალია, რეჟიმის საზრუნავი – ჩვენი განეიტრალება, ვინც კომფორტის ზონა დავტოვეთ და მთავარ საქმედ ლურჯი ტერორის კლანჭებიდან ქვეყნის გამოხსნა დავისახეთ!
აბა, ვნახოთ, ვის აჯობებს?!
ხალხის გაზაფხულს მოიყვანს მოქმედება, მძლავრი ერთობა და ორგანიზება, საერთაშორისო მხარდაჭერის გაძლიერება, თანაგრძნობის გაღვივება კიდევ უფრო ფართო წრეებსა და პროფესიულ კავშირებში.
ერთიანობა და ერთად დგომა – ეს არის გამარჯვების ფორმულა“, – განაცხადა ნანა ტოხვაძემ.
ინფორმაციას “სტრატეგია აღმაშენებლის” მედიასთან და საზოგადოებასთან ურთიერთობის სამსახური ავრცელებს
