თეთრი სახლის ოვალურ კაბინეტში ტრამპი-ზელენსკის სკანდალურ პრესკონფერენციას პოლიტიკური შეფასებებით ეხმაურება “ერთიანობა ნაციონალური მოძრაობის” ლიდერი გიგი უგულავა და საქართველოს კონკრეტულ მისიაზე აკეთებს მინიშნებას:
“გუშინდელი შერკინება ოვალურ ოთახში ყველა გაგებით კატასტროფაა, მაგრამ როგორც ყველა კატასტროფა – აჩქარებს ახლის დაბადებას. ტრამპის პირობებში ლამაზად, გათვლილად, დალაგებულად არაფერი მოხდება. გუშინდელი ამბავი ევროპისთვის შოკური თერაპიაა, აუცილებელი თერაპია, რომ ხვალ ყოყმანის გარეშე მიიღოს გადაწყვეტილება რუსული 300 მილიარდის გამოყენებაზე, სამხედრო ინდუსტრიაზე, იბრძოლოს ევროპული იდენტობისთვის უკრაინასთან მხარ და მხარ. აქ უკრაინა შეუცვლელია. ტრამპის ენითვე რომ ვთქვათ, აქ მას “კარტი უჭირავს ხელში”, აქ ის უდავო ლიდერია – ევროპელი ლიდერი, ევროპული ერის.
ასეთი შოკი სჯობს. ევროპელებს ერთმანეთთან ბევრი აქვთ ნაომარი, მაგრამ ერთად არ უბრძოლიათ. ევროპული იდენტობა სხვაგვარად ვერ გაჩნდება. ეს იდენტობა რუსეთის განეიტრალებასთან ერთად, ამერიკისგან “უხეში შვილიშვილის კმაყოფაზე მყოფი ფაფუკი ბაბუის” როლიდანაც გამოსვლას გულიახმობს. ტექნიკური გაერთიანება ევროკავშირის სახით ამ გამოწვევას ვერ გაუმკლავდება, ისევე როგორც ვერცერთი ევროპული სახელმწიფო ცალ ცალკე. ევროპას ამის რესურსი არა მარტო აქვს, არამედ სხვა გზაც არ აქვს.
ამ კუთხით გუშინდელი დღე უფრო საჭიროც კი იყო ყველას და ყოველმხრივი გამოფხიზლებისთვის.
ჩვენ, ქართველებსაც იგივე ბრძოლა გვაქვს, არა მარტო ვიბრძვით ევროპული მომავლისთვის, არამედ ვმონაწილეობთ ახალი ევროპის ჩამოყალიბებაში. ჩვენი ბრძოლაა – გამყალბებელი რუსი ოლიგარქის მოშორება. ჩვენ ამ ბრძოლაში არა მარტო ანტირუსები ვართ, არამედ უკვე ამ ახალი ევროპის განუყოფელი ნაწილი – ევროპელები.
ასე რომ, მეგობრებო, მხოლოდ და მხოლოდ ცეცხლი ოლიგარქიას🔥“, – წერს ფეისბუქის პირად გვერდზე გიგი უგულავა.
