„ახალი საქართველოს“ თავმჯდომარემ გიორგი ვაშაძემ პირდაპირ ეთერში კორონავირუსული ინფექციის დამდგენი სწრაფი ტესტი ჩაიტარა. გიორგი ვაშაძემ იქ მყოფ ჟურნალისტებსაც შესთავაზა ექსპერიმენტში მონაწილეობა და მათაც ჰქონდათ სურვილი და შესაძლებლობა გაეკეთებინათ ტესტები, დაედგინათ ჰქონდათ თუ არა კორონავირუსი. ოპოზიციონერმა ლიდერმა ყურადღება ასევე მთავრობის ჩართულობაზე გაამახვილა. მისი განმარტებით სახელმწიფო თუ არ ჩაერთო ამ საკითხში, სწრაფი ტესტების ჩამოტანა გართულდება, რადგან სპეც-რეისია საჭირო, საზღვრებია დაკეტილი და უამრავი პრობლემაა:
„მინდა პირდაპირ ეთერში ვნახოთ, როგორ მუშაობს სწრაფი ტესტები, რომელიც ძალიან მარტივია გასაკეთებლად. სამწუხაროდ PCR ტესტები ჯერ ვერ ჩამოვიტანეთ, მოლაპარაკებები გვაქვს სხვადასხვა კომპანიებთან და ვცდილობთ, რომ ჩამოვიდეს.
ნომერ პირველი ამოცანაა, რაც შეიძლება ხელმისაწვდომი გავხადოთ სწრაფი ტესტები და მოვახდინოთ სწრაფი დიაგნოსტირება. სწრაფი რეაგირება მოახდინა სამხრეთ კორეამ, რომელსაც არც საგანგებო მდგომარეობა გამოუცხადებია და ანტიკრიზისული გეგმა აქვს, რომლითაც მოქმედებს, მხოლოდ სკოლები დახურეს და ახლა აპირებენ რომ გახსნან, ბიზნესი მუშაობს ჩვეულებრივად და საერთაშორისო რეისებიც სრულდება.
გერმანიაში უკვე 200 ათასი ადამიანია შემოწმებული, ყველას ვისაც შეგვიძლია ვთხოვოთ მთავრობას, რომ ჩამოვიტანოთ ეს სწრაფი ტესტები, მესმის რომ ზოგი ამობობს 100%-იანი არ არის, მაშინ 100%-იანი არცერთი ტესტი არ არის, ეს ტესტები აპრობირებულია, იგივე პრინციპი არის С ჰეპატიტზე, B ჰეპატიტზე, აივ ინფექციაზეც,” – განაცხადა გიორგი ვაშაძემ.
გაერთიანებული ოპოზიციის ერთ-ერთმა ლიდერმა ხაზი გაუსვა იმ ფაქტს, რომ მსოფლიოში შექმნილი მდგომარეობის გამო დროულად უნდა მოხდეს ორგანიზება, რომ ტესტები რაც შეიძლება მალე ჩამოვიდეს საქართველოში, რაც ყველას ინტერესში უნდა იყოს:
“ყველა თუ გავერთიანდებით 48 საათში შეგვიძლია ძალიან ბევრი სწრაფი ტესტი ჩამოვიტანოთ. რა დროს პოზიცია-ოპოზიციაა?! სახელმწიფო თუ არ ჩაერთო ამ საკითხში, ვერ ჩამოვიტანთ, იმიტომ რომ სპეც-რეისია საჭირო, საზღვრებია დაკეტილი და უამრავი პრობლემაა.
ჩვენ შეკვეთილი გვაქვს, ხვალაც უნდა ჩამოვიდეს, მაგრამ ყველაფერი შეფერხებით მუშაობს. ერთი კვირაა ჩვენ ამ ტესტების ჩამოსვლას ველოდებით და იმის ნაცვლად რომ 2 დღეში უნდა ჩამოსულიყო ერთი კვირა დასჭირდა.
აქ მყოფ ჟურნალისტებს ყველას გექნებათ შესაძლებლობა გაიკეთოთ სწრაფი ტესტი და პასუხი იცოდეთ. მაგრამ მნიშვნელოვანი ისაა, რომ ეს საკმარისი არ არის. არის კიდევ PCR ტესტი და სხვადასხვა ტესტები, მთავრია რომ შემოვიტნოთ და ასევე მნიშვნელოვანია ლოჯისტიკა. მაგალითად ჩამოვიტანეთ მილიონი ტესტი, როგორ მოვახდენთ შემოწმებას? ამისათვის საჭიროა ინფრასტრუქტურის მომზადება, ექიმების მომზადება, შინაგან საქმეთა ორგანოების მომზადება. ყველას უნდა ჰქონდეს ინსტრუქცია. რაც დღეს არ არის გაკეთებული,” – აღნიშნა გიორგი ვაშაძემ.
ავტორი
თამთა ასლანიშვილი
