საქართველოს მოქალაქეებს ერთი თვის განმავლობაში ელექტრონულ წიგნებზე უფასოდ ექნებათ წვდომა

საქართველოს პრემიერ–მინისტრის გიორგი გახარიას ინიციატივით და საქართველოს განათლების, მეცნიერების, კულტურისა და სპორტის სამინისტროს ჩართულობით ელექტრონული წიგნების მაღაზია lit.ge საქართველოს ყველა მოქალაქეს „ბაკურ სულაკაურის გამომცემლობისა” და „პალიტრა L“ -ის 2093 ელექტრონულ წიგნზე უფასოდ ექნებათ წვდომა.

მთავრობის ადმინისტრაციის უფროსის მოადგილემ გიორგი სახოკიამ მადლობა გადაუხადა კომპანიებს სოლიდარობის აქციაში მონაწილეობისათვის და მოუწოდა კერძო სექტორს, თავიანთი კომპეტენციის და შესაძლებლობის ფარგლებში, მაქსიმალურად ჩაერთონ საზოგადოებისთვის აქტიურ ღონისძიებებში.

„ქვეყანაში არსებული მდგომარეობის გათვალისწინებით, ასევე შექმნილი ვითარების შესაბამისად, ძალიან მნიშვნელოვანია დღეს სახელმწიფოსა და კერძო სექტორს შორის თანამშრომლობა და ის სოლიდარული პასუხისმგებლობა, რაც ამ კომპანიებმა გამოიჩინეს. მინდა მადლობა გადავუხადო ინტერნეტ-მაღაზია lit.ge-ს, „პალიტრა L”- სა და „ბაკურ სულაკაურის გამომცემლობას“ იმ შესაძლებლობისთვის, რომ ნებისმიერი ასაკის მკითხველისთვის ხელმისაწვდომს ხდიან, როგორც მხატვრულ, ასევე სამეცნიერო ლიტერატურას. ეს განსაკუთრებით მნიშვნელოვანია იმ პერიოდში, როდესაც არდადეგები არის გახანგრძლივებული და სასწავლო პროცესი ქვეყნის ტერიტორიაზე დროებით შეჩერებულია. აქვე მინდა ვისარგებლო შემთხვევით და მოვუწოდო კერძო სექტორს, რომ სოციალური პასუხისმგებლობის გათვალისწინებით, თავიანთი შესაძლებლობის ფარგლებში მაქსიმალურად ჩაერთონ საზოგადოებისთვის სასარგებლო ღონისძიებებში,“ – განაცხადა გიორგი სახოკიამ.

ბაკურ სულაკაურის გამომცემლობა კიდევ ერთი ინიციატივით გამოვიდა, კერძოდ კი ვებგვერდი – www.sulakauri.ge ყველა მსურველს, ნაბეჭდი წიგნის საფასურის გადახდის შემდგომ, საქართველოს მასშტაბით წიგნებს უფასოდ მიაწვდის.

ასევე ბაკურ სულაკაურისა და პალიტრა L–ის გამომცემლობა მსურველებს უფასოდ სთავაზობს აუდიო წიგნებს.

ელექტრონულ წიგნებთან წვდომისათვის უნდა გავითვალისწინოთ შემდეგი საფეხურები:

www.lit.ge -ზე განთავსებული ელექტრონული წიგნების ხელმისაწვდომობისთვის, აუცილებელია:

✅ მომხმარებელი დარეგისტრირდეს საიტზე www.lit.ge (ელ.ფოსტით ან ფეისბუქით);

✅ ავტორიზირებული მომხმარებელი უნდა შევიდეს “სამკითხველოს” გვერდზე ( https://www.lit.ge/packages/ )

✅ სადაც სამკითხველოს ერთთვიანი პაკეტი დახვდება უფასოდ;

✅ პაკეტის გააქტიურების შემდეგ, მომხმარებელს ეძლევა სასურველი სამი წიგნის არჩევისა და საკუთარ ბიბლიოთეკაში დამატების საშუალება;

✅ სამკითხველოში ხელმისაწვდომია 2093 წიგნი: https://www.lit.ge/index.php…;

✅ წიგნების წასაკითხად, ელექტრონულ მოწყობილობაზე აუცილებელია იოტა რიდერის აპლიკაციის გადმოწერა: https://www.lit.ge/aplikaciebi/

ავტორი
თამთა ასლანიშვილი