ქართველი მწერალი და დრამატურგი, ლაშა ბუღაძე სოციალურ ქსელში სტატუსს აქვეყნებს არჩევნების ლეგიტიმურობის საკითხთან დაკავშირებით:
,,თუნდაც მხოლოდ ჩვენ რაც ვნახეთ ისანში არჩევნების დღეს, ამის მერე ვერავინ და ვერაფერი დამარწმუნებს, რომ ივანიშვილის პარტიას რაიმე ლეგიტიმურობა აქვს.
მისი “პარლამენტი” იქნება ნაქურდალი და ყველა ნაქურდალის მეწილე გახდება, ვინც კი ამის ნაწილად ქცევას გაბედავს.
არალეგიტიმურობა არის და იქნება დამოკლეს მახვილი ივანიშვილის რეჟიმზე.
არაღიარებულ, ერთპარტიულ და ნაქურდალ ბანდას უნდა ახსოვდეს, რომ ეს გაურკვევლობა მათი პრობლემაა და არა ჩვენი: ხალხის, ვისაც შეთქმულება მოუწყვეს არჩევნების გაყალბებით.
დასავლეთი არ აღიარებს ამ არჩევნებს და ეს ასე უნდა დარჩეს მომავალშიც. ლეგიტიმაციას აქ და ახლა ქართველი ხალხი იძლევა და ამას ერგება (და კვლავაც მოერგება) ყველა სხვაც.
მესმის ხმები, რომ უნდა დაიწყოს პარალელურად მზადება მუნიციპალური არჩევნებისთვის… მაგრამ ვინ ჩაატარებს ამ არჩევნებს? ეს დანაშაულებრივი ცესკო, მისი გამყალბებელი თავმჯდომარით – რომ ჩივის, გამოჟონილი წერტილებით ნუ მაწუხებთო… თუ იმ უბნების მაცხოვრებლები (სოფლებზე აღარაფერს ვამბობ) ქრთამით და შანტაჟით რომ დათმეს თავიანთი პირადობის მოწმობები?!
ნებით თუ უნებლიეთ “ფასადად” არ უნდა ვექცეთ გამყალბებლებს. ის რაც ჩვენი არგუმენტია, უმნიშვნელოვანესი არგუმენტია პროტესტისათვის: ივანიშვილის “პარლამენტს” არ აქვს ლეგიტიმურობა.
ქურდს ყოველთვის უნდა ახსოვდეს, რომ ქურდია”, – წერს ლაშა ბუღაძე.
ავტორი
ნინი ხიჯაკაძე
