“ერთიანობა ნაციონალური მოძრაობის” წევრი თეონა ჭალიძე საპროტესტო აქციაზე ემოციურად მიმართავს საზოგადოებას და 2 შავ წერტილზე ამახვილებს ყურადღებას, რომელსაც გაყალბებული, ფარულობადაკარგული არჩევნების სიმბოლოდ მიიჩნევს:
“მე დღეს აქ ვარ, ამ სპეციალური პლაკატით წარმოდგენილი და მინდა კიდევ ერთხელ ხაზი გავუსვა იმ ფაქტს, რომ ეს 2 შავი ლაქა, 2 შავი წერტილი არის სწორედ საქართველოს დღევანდელი ხელისუფლების, “ქართული ოცნების” სიმბოლო. ეს არის გაყალბებული არჩევნების სიმბოლო და ასეთი 2 შავი წერტილი უნდა გაჩნდეს ყველგან, მთელ საქართველოში, ამის დანახვაზე ყველა ადამიანი გონებაში ფიქრობდეს, რომ დიახ, სწორედ ეს 2 შავი ლაქა არის გაყალბებული, ფარულობადარღვეული არჩევნების სიმბოლო.
ამ პლაკატზე ჩემი უმცროსი შვილის, ნინის პატარა ხელებია მიხატული და მე სწორედ მისთვის, ამ პატარებისთვის ვარ აქ წარმოდგენილი და მინდა რომ ჩვენი შვილებისთვის უკეთესი საქართველოსთვის, ევროპული ქვეყნისთვის ვიბრძოლო.
დარწმუნებული ვარ რომ ჩვენს მიზანს მივაღწევთ! ხელახალი არჩევნები არის აუცილებელი იმისთვის, რომ აღსრულდეს ქართველი ხალხის ნება და საქართველომ განაგრძოს გზა ევროპისკენ“, – განაცხადა თეონა ჭალიძემ.
