“რომ არ გაგვეკეთებინა ეს ინტერვენცია, მერწმუნეთ, რომ მოხდებოდა ლარის მყისიერი გაუფასურება, რაც გააღარიბებდა ჩვენს მოსახლეობას” – ნათია თურნავა

ეროვნული ბანკის პრეზიდენტის მოვალეობის შემსრულებელმა, ნათია თურნავამ სავალუტო რეზერვების შემცირებასთან დაკავშირებით განმარტებები გააკეთა და განაცხადა, რომ წინასაარჩევნოდ ხელოვნურად ატეხილი აჟიოტაჟის გამო, დოლარზე გაიზარდა მოთხოვნა, რის გამოც ეროვნულმა ბანკმა მიზანშეწონილად ჩათვალა სავალუტო რეზერვების გამოყენება ლარის კურსის სტაბილურობის შესანარჩუნებლად:

„წინასაარჩევნოდ, მათ შორის, ხელოვნურად ატეხილი აჟიოტაჟის გზით, გაუარესდა მოლოდინები, გარკვეული შიშები გააჩინა, გაჩნდა აჟიოტაჟური მოთხოვნა დოლარზე და ასეთ დროს, მით უფრო, როცა ეს არ მომდინარეობს ეკონომიკური მიზეზებით, ჩვენ ვალდებული ვართ, რომ ეს მღელვარება ჩავაქროთ და ჩვენ ეს გავაკეთეთ.

ჩვენ რომ არ გაგვეკეთებინა ეს ინტერვენცია, მერწმუნეთ, რომ მოხდებოდა ლარის მყისიერი გაუფასურება, რაც გააღარიბებდა ჩვენს მოსახლეობას, საბოლოო ჯამში, გააღარიბებდა ბიზნესს, შეარყევდა ლარის მიმართ ესოდენ დიდი ძალისხმევით ნაგროვებ, განმტკიცებულ ნდობას და ამის უკან შეტრიალება გაცილებით უფრო რთული იქნებოდა”, – განაცხადა ნათია თურნავამ.