„ახალი საქართველოს“ თავმჯდომარემ გიორგი ვაშაძემ და ლისის ონკოლოგიის ცენტრის თანამშრომლებმა ერთობლივად მიმართეს საქართველოს ჯანდაცვის მინისტრს, ეკატერინე ტიკარაძეს და მასთან შეხვედრა მოითხოვეს.
მედიკოსები საუბრობენ საავადმყოფოს ინფრასტრუქტურის მძიმე ვითარებაზე. აღინიშნა ისიც, რომ დაახლოებით 8-9 თვეა ანაზღაურების გარეშე უწევთ მუშაობა. როგორც კლინიკის თანამშრომლები საუბრობენ, მათი მთავარი მიზანი საავადმყოფოს რეაბილიტაცია, გადარჩენა და განვითარებაა.
„ჩვენ ვიმყოფებით ლისის ტბაზე ონკოლოგიურ საავადმყოფოში, სადაც უმძიმესი ვითარებაა. რვა თვეა, რაც ექიმებს ხელფასები არ მიუღიათ, საავადმყოფოს ინფრასტრუქტურა უმძიმეს ვითარებაშია და სამწუხაროდ უნდა ვთქვათ, რომ ამ სამედიცინო დაწესებულების გაკოტრება მიზანმიმართულად მიდის, რაც ყველაზე საგანგაშოა ექიმებმა არ იციან ხვალ ან ზეგ რა იქნება. თავისი პირადი სახსრებით ამ დრომდე საავადმყოფოში დადიან, მკურნალობენ ავადმყოფებს, მაგრამ მათ ხელფასი და ანაზღაურება არ აქვთ.
ის რაც დღეს ხდება მართლაც არაადამიანური პირობებია და ჩვენ გვინდა მოვითხოვოთ ჯანდაცვის სამინისტროსგან, ქალბატონი ტიკარაძისგან, რომ ათი დღის ვადაში, 15 მარტამდე, კონკრეტული გეგმა წარმოადგინოს – რას აპირებს იმ დავალიანებაზე, რაც არის სახელფასო კუთხით და რას აპირებთ ამ სამედიცინო დაწესებულებასთან დაკავშირებით, რომელიც ერთ–ერთი მთავარი ფუნდამენტი იყო სწორედ ონკოლოგიურ დაავადებებთან ბრძოლის კუთხით საქართველოში და არამარტო საქართველოში, არამედ მთლიანად სამხრეთ კავკასიაში,“ – განაცხადა გიორგი ვაშაძემ.
ავტორი
თამთა ასლანიშვილი
