პარტია ,,საქართველოსთვის” თავმჯდომარე, გიორგი გახარია Facebook-ის ოფიციალურ გვერდზე განცხადებას აქვეყნებს, სადაც პარტია ,,ქართული ოცნების” დამფუძნებელსა და საპატიო თავმჯდომარეს, ბიძინა ივანიშვილს კონკრეტული შეკითხვებით მიმართავს:
,,დაუშვებელია მსგავსი საკითხები, არჩევნებამდე რამდენიმე კვირით ადრე, არაფორმალურად და დამალულად წყდებოდეს.
ივანიშვილი დებატებს გაურბის. თუმცა, მოვუწოდებ, საქართველოს ტერიტორიული მთლიანობის საკითხზე მაინც გამოიჩინოს გამბედაობა, ზუგდიდში დაგეგმილ მორიგ შეხვედრაზე ბოდიშის მოხდას რომ მოითხოვს, ტერიტორიული მთლიანობის აღდგენისთვის საკონსტიტუციო უმრავლესობას რომ მოითხოვს, მაშინ მაინც გაგვცეს პასუხები საქართველოს მოქალაქეებს შემდეგ კითხვებზე:
1. რა ფორმით და პირობებით ფიქრობს საქართველოს ტერიტორიული მთლიანობის აღდგენას მაშინ, როცა არც რუსეთის და არც ოკუპირებული აფხაზეთის და ცხინვალის რეგიონის მარიონეტული რეჟიმების პოზიციები არ შეცვლილა ამ რეგიონების ე.წ. დამოუკიდებლობის უკან გაწვევის და საოკუპაციო ჯარების გაყვანის შესახებ?
2. რა ტიპის სახელმწიფო მოწყობისთვის და საკონსტიტუციო ცვლილებებისთვის ითხოვს საკონსტიტუციო უმრავლესობას?
3. დასავლეთთან დაპირისპირების და როგორც შედეგის – საქართველოს იზოლაციის, ასევე, დღევანდელი ხელისუფლების შეცვლილი პოზიციის და ომის დაწყების საკუთარ ქვეყანაზე დაბრალების პირობებში,
ემუქრება თუ არა საფრთხე არაღიარების პოლიტიკას და როგორ აპირებს არაღიარების პოლიტიკის დაცვას?
მხოლოდ ამ კითხვებზე საჯარო პასუხების გაცემის შემთხვევაში შეუძლია ივანიშვილს ისაუბროს მშვიდობაზე, სუვერენიტეტის დაცვაზე და ქვეყნის მშვიდობიანად გამთლიანებზე.
წინააღმდეგ შემთხვევაში ეს არის მისი მორიგი “წინასაარჩევნო ტყუილი“, რასაც საბოლოოდ შეუძლია მოსპოს საქართველოს სუვერენიტეტის და ტერიტორიული მთლიანობის აღდგენის რეალური შესაძლებლობა!”, – განაცხადა გიორგი გახარიამ.
ავტორი
ნინი ხიჯაკაძე
