ქართველი მწერალი და დრამატურგი, ლაშა ბუღაძე Facebook-ის გვერდზე სტატუსს აქვეყნებს, სადაც კესარია აბრამიძის მკვლელობის ფაქტთან დაკავშირებით საუბრობს:
,,განსხვავებულთა ჩაგვრა და რეპრესია საქართველოში პოლიტიკურად წახალისებულია “ქართული ოცნებისა” და უშუალოდ მისი აგრესიული და სოციოპათი ლიდერის, ივანიშვილის მიერ. ამას, ამ შემთხვევაში, ხელს უწყობს ბრბოს მენტალიტეტიც, რომელიც სიცოცხლის უფლებას არ აძლევს მისგან განსხვავებულს.
მოკლული ქალის არჩევანი არ ყოფილა მსხვერპლად ყოფნა, რომელიც ემპათიას მხოლოდ მაშინ იმსახურებს, როცა უკვე მკვდარია, არადა მისი არჩევანი სიცოცხლე იყო და ამაშიც ჩანდა მისი უნიკალურობა: თავს არ წარმოაჩენდა ჩაგრულად, არამედ პირიქით – ის იყო მშვენიერი, ლაღი და თავდაჯერებული. მაგრამ სამწუხაროდ მას იმთავითვე განაჩენი ჰქონდა გამოტანილი იმათგან, ვინც ჯიუტად არ იძლევა სიცოცხლის უფლებას.
კესარია მოკლა მანიაკმა, რომელსაც რცხვენოდა და ეშინოდა იმ ხალხის, ვინც ის მკვლელად გაზარდა. კაცებს ხომ მჩაგვრელებად და მკვლელებად ზრდიან ისტორიულად და ამიტომაც კლავენ ისინი ქალებს და არა პირიქით. ქალები არ კლავენ, კაცები კლავენ!
“ქართული ოცნებაც” უკვე წლებია ქართველის ამ კადიროვულ ჯიშზე დებს ფსონს – გარეგნულად კავკასიელი გორსალა რომ არის და შინაგანად გარუსებული სადისტი, მღვდლის წვერით და თეძოებზე მოტკეცილი ტრიკოთი; ზონდერის ნიღბით, აქციებზე რომ ცემს ზურგზე ევროკავშირის დროშამოხვეულ ბავშვს და გული კი კირკოროვის შოუს მოცეკვავეობისკენ მიუწევს.
გარუსებაც ხომ სწორედ ამას ნიშნავს: მუდმივად შუშის კოლბის და ვითომ ჯვრის ფორმის რკინის კონსტრუქციების უკან რომ უნდა დამალო შენი ავადმყოფური ზრახვა-სურვილები და სხვას კი, ვისაც ბედნიერება და განვითარება უნდა, სიცოცხლის უფლება არ მისცე”, – წერს ლაშა ბუღაძე.
ავტორი
ნინი ხიჯაკაძე
