ქართველი მწერალი და დრამატურგი, ლაშა ბუღაძე Facebook-ის გვერდზე სტატუსს აქვეყნებს, სადაც მწვავე შეფასებას აკეთებს ,,ქართული ოცნების” დამფუძნებლისა და საპატიო თავმჯდომარის, ბიძინა ივანიშვილის განცხადებასთან დაკავშირებით, სადაც საუბარია, რომ საქართველოს წარმომადგენლებმა ბოდიში უნდა მოიხადონ 2008 წლის აგვისტოს ომის გამო:
,,გერმანიის კანცლერმა ვილი ბრანდტმა ნაცისტების დანაშაულების გამო დაჩოქილმა მოიხადა ბოდიში ვარშავის გეტოს აჯანყების მსხვერპლთა მემორიალის წინაშე 1970 წელს, მაგრამ ბოდიში არავის არასდროს მოუხდია ნაცისტების წინაშე და არც არავინ მოუხდის ბოდიშს ნეოფაშისტ მკვლელ პუტინს.
ბიძინა ივანიშვილმა კი გადაწყვიტა მოღალატეობრივად დააკნინოს საქართველო და დასცინოს (!) ჩვენი ქვეყნისთვის თავგანწირულთა ხსოვნას!
ვის უხდის ეს თაღლითი ბოდიშს? რუსებს, რომელთაც მოკლეს ანწუხელიძე? შინდისის გმირების მკვლელებსა და გინტურის მკვლელებს? ვისი სახელით? როგორ ბედავს ეს კოლბაში მჯდარი მოღალატე ცინიკოსი ამდენს? ასეთი შეურაცხყოფა არავის და არასდროს მიუყენებია საქართველოსთვის, რასაც ეს კაცი ბედავს!
რა ფულს გაძლევენ ამისთანას ზოგიერთებს, ამ სამარცხვინო კოშმარს რომ უკრავთ ტაშს – რაც არ უნდა ძალით დაგატარებდნენ ამ შეხვედრებზე! რუსებისთვის ბოდიშის მოხდაში გიხდიან ფულს – კარგი გიქნიათ, ანწუხელიძე და გინტური რომ მოგიკლავთო?!”, – წერს ლაშა ბუღაძე.
ავტორი
ნინი ხიჯაკაძე
