30 აგვისტოს, მოძრაობა “სირცხვილიამ” ვიდეორგოლი გამოაქვეყნა (რომელიც ამჟამად წაშლილია ორგანიზაციის ფეისბუქის გვერდიდან), სადაც ორგანიზაციის გადაწყვეტილება, უცხოური ძალის ინტერესების გამტარებელ ორგანიზაციად რეგისტრაციის გადაწყვეტილების მიღებასთან დაკავშირებით განმარტებები გააკეთა, რასაც მმართველი გუნდის მხრიდან პოზიტიური შეფასებები მოჰყვა, ხოლო სამოქალაქო აქტივისტების მხრიდან – ნეგატიური განწყობა. დღეს, 31 აგვისტოს, ორგანიზაციამ განცხადება გაავრცელა, სადაც ნათქვამია, რომ უარი ითქვა რეგისტრაციაში გატარებასთან დაკავშირებით მიღებულ გადაწყვეტილებაზე:
“მოძრაობა “სირცხვილია” აუქმებს რუსულ კანონთან დაკავშირებით რეგისტრაციის გადაწყვეტილებას.
გვესმის და ვიღებთ საზოგადოების რეაქციას. ჩვენთვის მნიშვნელოვანია მოქალაქეებისა და თანამოაზრეების კრიტიკა. ძალიან ვწუხვართ, რომ სათანადოდ ვერ შევაფასეთ ის შედეგები, რაც ჩვენს გადაწყვეტილებას შეიძლებოდა მოჰყოლოდა. მიგვაჩნია, რომ ჩვენი განცხადების დროც, ფორმაცა და შინაარსიც იყო შეცდომა და შესაძლებელი იყო რისკების უკეთ გათვლა და პრევენცია.
ჩვენი გადაწყვეტილება ეფუძნებოდა მიზანს, რომ არჩევნებში მოქალაქეთა მონაწილეობის გასაზრდელად დაგეგმილი კამპანიები ჩაგვეტარებინა, რათა ოქტომბრის არჩევნებზე ხელისუფლების ცვლილებისთვის შეგვეწყო ხელი, თუმცა, გამოხმაურებებზე დაყრდნობით ვიაზრებთ, რომ თანამოაზრეებშიც კი ნიჰილიზმისა და იმედგაცრუების დათესვას შევუწყვეთ ხელი, რაც ცხადია, საერთო მიზანს როგორც მოკლე, ასევე გრძელვადიან პერსპექტივაში აზიანებს.
ჩვენი გადაწყვეტილების ერთერთი საფუძველი იყო ის, რომ ფუნდამენტურად არასწორად მიგვაჩნდა ხელისუფლებისთვის წინასაარჩევნოდ ჯარიმების გადახდა, ახლაც იმავე აზრზე ვართ. ამიტომ, დაჯარიმების შემთხვევაში, “სირცხვილია” არ აპირებს ჯარიმების გადახდას.
გიორგი მჟავანაძე ტოვებს დირექტორის თანამდებობას და მუშაობას ახალი ხელმძღვანელობით ვაგრძელებთ.
მადლობა თანამოაზრეებს გულწრფელი კრიტიკისა და რჩევებისთვის“, – ნათქვამია გავრცელებულ განცხადებაში.
