განათლების ყოფილი მინისტრი, პოლიტიკის ექსპერტი გია ნოდია, თავისი კონკრეტული შეფასებებით, აშშ-ს დემოკრატიული პარტიის საპრეზიდენტო კანდიდატის, კამალა ჰარისის ერთგვარ დახასიათებას ახდენს:
“ვერ ვიტყვი, რომ ბევრი იამაიკელი გოგო შემხვედრია ცხოვრებაში, მაგრამ ვინც შემხვედრია, ყველას ერთი თვისება ჰქონდა: სულ იცინოდნენ. ამის გამო ზოგადად იამაიკელი გოგოების მიმართ დადებითი განწყობა შემექმნა.
როგორც ჩანს, კამალა უფრო იამაიკელი მამისკენ წავიდა და არა ინდოელი დედისკენ (კამალას ასაკის ინდოელი ქალები უფრო სერიოზულობას და სიდარბაისლეს ასხივებენ).
რისთვის ვამბობ ამას? კამალა რომ სულ იცინის, ეს მისი, როგორც კანდიდატის ძალაა და არა სისუსტე. ამის გამო მისგან პოზიტიური „ვაიბი“ მოდის. მით უმეტეს, ამერიკელებს სიცილი უყვართ. თუ რესპუბლიკელები იმ ნიშნით „მიაწვებიან“, ეს ქალი სულ იცინისო, მათი მხრიდან დიდი სისულელე იქნება. პირიქით, მათმა კანდიდატმაც რომ ხანდახან გაიცინოს, არ აწყენდა.
პრობლემა ისაა, რომ სიცილ-ხითხითის და „ჯიგარი ქალის“ წარმატებული იმიჯის უკან არავითარი პოლიტიკური შინაარსი არ იმალება (ან თუ იმალება, ისეთია, რომ ჯობია დამალო). კამალას შეგნებული ტაქტიკაა, რომ კონკრეტული არაფერი თქვას, რადგან შეიძლება სისულელე წამოცდეს და მერე ოპონენტები ამას ხელზე დაიხვევენ. არავითარი ინტერვიუები და პრეს-კონფერენციები – მხოლოდ ძალიან ზოგადი გამოსვლები! ჯერ ერთი თქვა ცოტა კონკრეტული – საკვების ფასებს გავაკონტროლებო – და ნეტავ არ ეთქვა.
კამალას როგორც პრეზიდენტობის კანდიდატის პირველი ეტაპი ძალიან წარმატებული იყო: მან დემოკრატებს ტრამპის დამარცხების რეალისტური პერსპექტივა დაუბრუნა. ამის გამო ისინი ეიფორიაში გადავიდნენ ღრმა დეპრესიის შემდეგ. მაგრამ ჯერჯერობით ეს მისი პოზიტიური ვაიბის ხარჯზე მოხდა. როდემდე გაძლებს ისე, რომ კონკრეტული არაფერი თქვას? ტრამპთან პირისპირ დებატებს დიდი მნიშვნელობა ექნება, თუმცა არც ტრამპი მეჩვენება კარგ ფორმაში“, – წერს ფეისბუქის პირად გვერდზე გია ნოდია.
