,,ჭავჭავაძის კვლევითი ცენტრის” დამფუძნებელი, ზაზა ბიბილაშვილი Facebook-ის პირად გვერდზე სტატუსს აქვეყნებს, სადაც უკრაინის მხრიდან რუსეთის წინაამღდეგ განხორციელებულ შეტევაზე საუბრობს:
,,ისე, მართლა რა უცნაურია. ყველანი ვლოცულობთ. აქეთ ჩვენ, იქით – ისინი. ვის ლოცვებს შეისმენს ღმერთი?
იმ ხალხისა, ვინც საკუთარ მიწა-წყალს, ოჯახებს და თავისუფლებას იცავს? თუ იმათი, ვინც სხვას ესხმის თავს, უმანკო ბავშვებს ხოცავს და ვისაც სხვისი დამონება სწადია? გაჭირებული ადამიანების თუ მკვლელებისა და აგრესორების?
კი ცდილობს ზოგი კაბიან-პაგონიანი ჩვენს დაბნევას, მაგრამ ქრისტე ტვირთმძიმეთა და მაშვრალთა ღმერთია და არა დამპყრობლების, ოლიგარქებისა და ფარისევლების მფარველი. სიმართლე და სიკეთე აქეთაა. აქეთაა ღმერთიც. იქით მხოლოდ ბოროტებაა.
ასე რომ, ქ-ნმა მარგო სიმონიანმა ის “ლოცვები” კონტრაბანდისტი კირილე გუნდიაევის სახელზე აღავლინოს. წინ დაჯდეს ოღონდ – მალე მივა. ვილოცოთ მისთვისაც, ემანდ ბეჭი არ ამოიგდოს პირჯვრის წერით”, – წერს ზაზა ბიბილაშვილი.
ინფორმაციისთვის: სოციალურ ქსელში გავრცელებული კადრების მიხედვით, კურსკის ოლქში უკრაინულ არმიას რუსული ჯარი წინააღმდეგობას ვერ უწევს და მარცხს განიცდის.
ასევე, Facebook-ის გვერდზე სტატუსი გამოაქვეყნა რუსმა ჟურნალისტმა მარგარიტა სიმონიანმა, სადაც მომხდარი ფაქტის გამო მოსახლეობას ლოცვისკენ მოუწოდებდა.
ავტორი
ნინი ხიჯაკაძე
