პარტია ,,საქართველოსთვის” თავმჯდომარე, გიორგი გახარია მოსახლეობასთან შეხვედრის დროს საუბრობს ქვეყანაში არსებულ ეკონომიკურ მდგომარეობასთან დაკავშირებით:
,,მინიმალური ხელფასი ამ ქვეყანაში, მინიმუმ, დღეს, უნდა იყოს 950 ლარი. საკმარისია? – არ არის საკმარისი. უფრო მეტია საჭირო. არ შეიძლება, ადამიანს კვირაში 6 დღე რომ ამუშავებ, 400 ლარს უხდიდე. საერთოდ დანაშაულია.
უმუშევრობა დაზღვეული უნდა იყოს. იმიტომ, რომ მე დღეს სამსახური რომ მაქვს, წავედი – იქ რაღაც კრედიტი ავიღე, ბავშვი სკოლაში უნდა გავუშვა, ვიღაცას, ღმერთმა ნუ ქნას და ოპერაცია უნდა გაუკეთო. მერე სამსახური რომ დავკარგე, მონობაში ვარ ბანკთან. ეს ბანკი გადამაგდებს მიკროსაფინანსოში, მიკროსაფინანსო მევახშესთან, დამთავრდა, დავიღუპე. ამიტომ ადამიანი სამსახურს რომ კარგავს, სახელმწიფომ ნება უნდა იბოძოს და 6 თვით უნდა დაუდგეს გვერდში და მინიმალური ხელფასი უნდა მისცეს. 6 თვეში სამსახური უნდა იპოვოს. თუ 6 თვეში სამსახური ვერ იპოვა ე.ი. ის ზარმაცი ყოფილა. ახლა იმას მთელი ცხოვრება ვერ ვარჩენთ.
ეს შესაძლებლობა უნდა მივცეთ, რომ არ გაბანკროტდეს. პენსია უნდა იზრდებოდეს ისე, როგორც შეესაბამება ეკონომიკის ზრდას და არა ისე, ვიღაცები რომ მდიდრდებიან და პენსიაზე პენსიონრებს ეუბნებიან, რომ ,,ხმა მომეცი და მაშინ გაგიზრდი პენსიას”, ეს ყველაფერი სამარცხვინოა! ან სოციალურად დაუცველს რომ ეუბნებიან, რომ ,,ხმა მომეცი და მაშინ არ მოგიხსნი”. მასწავლებელს რომ ეუბნებიან, ,,ხმა მომეცი და არ გაგაგდებ”. ან პოლიციელს რომ ეუბნებიან ,,ახლა მე შენ ხელფასს გაძლევ, ამიტომ ვალდებული ხარ მოხვიდე და ხმა მომცე”, სამარცხვინოა ეს ყველაფერი!”, – განაცხადა გიორგი გახარიამ.
ავტორი
ნინი ხიჯაკაძე
