ჯანდაცვის პოლიტიკის ექსპერტი, მედიცინის დოქტორი სერგო ჩიხლაძე ქვეყანაში კორონავირუსის გავრცელების საწინააღმდეგოდ გასატარებელ ღონისძიებებთან დაკავშირებით ჯანდაცვის მსოფლიო ორგანიზაციისა და ევროპის დაავადებათა კონტროლის ცენტრისგან მიღებულ რეკომენდაციებზე ამახვილებს ყურადღებას და შესაბამის სამსახურებს ქმედითი რეაგირებისკენ მოუწოდებს:
“კორონავირუსის პრევენციისათვის და კონტროლისთვის მოწოდებულია ძალიან მკაფიო რეკომენდაციები როგორც ჯანდაცვის მსოფლიო ორგანიზაციისგან, ასევე ევროპის დაავადებათა კონტროლის ცენტრისგან. გამოვყოფდი რამდენიმე საკვანძო მიმართულებას რაზედაც ჩვენი ჯანდაცვის სისტემა უნდა ახდენდეს რეაგირებას და უნდა იყოს მზად. ყურადღება კი მისაქცევია შემდეგზე:
✔ პოტენციურ პაციენტთან პირველი კონტაქტი, მარტივი სკრინინგი და რისკების შეფასება;
✔ პაციენტის ან სავარაუდო პაციენტის ტრანსპორტირების მოთხოვნები;
✔ სამკურნალო დაწესებულების და პერსონალის მზაობა (პერსონალი გადამზადება და ეკიპირება, ბოქსირებული პალატების აღჭურვა და სტანდარტები, აერაციის და სტერილიზაციის რეჟიმები, ნარჩენების მართვა და ა.შ.);
✔სავარაუდო ეპიდემიის გავრცელების შემთხვევაში ზუსტად გაწერილი ქმედებების ალგორითმი.
ჩვენი სისტემა რამდენადაა მზად და გამართულად მსგავსი სიტუაციების სამართავად, ეს სხვა საკითხია. სამწუხაროდ სეზონური გრიპის მართვაც კი ხარვეზებით მიმდინარეობს ჩვენ ქვეყანაში. მით უმეტეს, საფრთხილოა მსგავსი ახალი და ნაკლებ შესწავლილი ინფექციების მართვა, როგორიცაა 2019-nCoV (კორონავირუსი).
ამავე დროს, დავძენ, რომ ლეტალობის მაჩვენებელი ჯერჯერობით საკმაოდ დაბალია და 2-2.5 % ს არ სცილდება, ასევე ჯერჯერობით საქართველო არ მიეკუთვნება მაღალი რისკის ჯგუფის ქვეყანას. თუმცა, სანამ პრობლემური გახდება ეპიდსიტუაცია ქვეყნის შიგნით, მანამდე უნდა ჰქონდეს ქვეყნის ჯანდაცვის სისტემას მზაობა და გათვლები ყველა სახის სცენარისთვის,” – აცხადებს სერგო ჩიხლაძე.
