“ჩვენმა დღევანდელმა ხელისუფლებამ კაბინეტებში დარჩენა, ხელისუფლების შენარჩუნება გაცვალა ქვეყნის სუვერენიტეტის და ტერიტორიული მთლიანობის მტკიცე მხარდაჭერის აქტზე ხელის მოწერაში” – გიორგი გახარია

ყოფილი პრემიერ-მინისტრი, პარტია ,,საქართველოსთვის” თავმჯდომარე, გიორგი გახარია YouTube-ის საკუთარ პლატფორმაზე, გადაცემა ,,გახარიას კვირაში” მწვავე შეფასებას ახდენს ,,ქართული ოცნების” კონკრეტულ პოლიტიკურ გადაწყვეტილებებთან დაკავშირებით, რასაც დანაშაულებრივ ქმედებებად მიიჩნევს:

,,ეუთოს განცხადება, რომელსაც საქართველოს ხელისუფლებამ, არ ვიცი ახლა ამას რა დავარქვა, დანაშაულებრივად არ მისცა ხმა, იქაც მარტივი რამ იყო – მათ ფაქტობრივად ქვეყნის სუვერენიტეტის, მშვიდობიანად ტერიტორიული მთლიანობის აღდგენის, რუსეთზე მოთხოვნის – 2008 წლის შეთანხმების პირობების შესრულების, ამას ყველაფერს, ხელი არ მოაწერეს, ხმა არ მისცეს მხოლოდ და მხოლოდ იმიტომ, რომ იგივე განცხადებაში, იგივე რეზოლუციაში იყო მოთხოვნა ნორმალურად, დემოკრატიულად, კონკურენტულად არჩევნების ჩატარების.

ფაქტობრივად, ჩვენმა დღევანდელმა ხელისუფლებამ კაბინეტებში დარჩენა, ხელისუფლების შენარჩუნება გაცვალა ქვეყნის სუვერენიტეტის და ტერიტორიული მთლიანობის მტკიცე მხარდაჭერის აქტზე ხელის მოწერაში.

ბოლო ტექსტი რომ წაიკითხოთ, იდეალური ,,ვორდინგია”, იდეალური ფორმულირებებია, თუ როგორ უჭერენ საქართველოს სუვერენიტეტს, ტერიტორიულ მთლიანობას, როგორ სთხოვენ რუსეთს დატოვოს საქართველოს ტერიტორია.

მატყუარა ხელისუფლებამ, რომელიც თავის თავს კონსერვატულს, ტრადიციულს ეძახის, ჩაიდინა ანტიეროვნული ნაბიჯი, ქმედება. ამ რეზოლუციას ხმა არ მისცა მხოლოდ და მხოლოდ იმიტომ, რომ ამავე რეზოლუციაში მათთან იყო მოწოდება, რომ ,,მეგობრებო, ნორმალურად ჩაატარეთ არჩევნები, გაუფრთხილდით ქართულ დემოკრატიას და ქართველი ხალხის ნებას”, – განაცხადა გიორგი გახარიამ.

ავტორი
ნინი ხიჯაკაძე