პოლიტიკური პლატფორმა – “ერთიანობა საქართველოს გადარჩენისთვის” სახე, საერთაშორისო ურთიერთობების სპეციალისტი, გია ჯაფარიძე გაერთიანების ოფისში გამართულ ბრიფინგზე პოლიტიკურ შეფასებებს აკეთებს ქვეყანაში შექმნილ რეალობასთან დაკავშირებით:
,,მოგესალმებით, ეს ჩემი პირველი ბრიფინგია ახალ ამპლუაში და სასურველი იქნებოდა, რომ პოზიტიურ საკითხზე ყოფილიყო ეს ბრიფინგი, თუმცა ასე არ არის.
დღეს ყველასთვის ცნობილი გახდა ის ფაქტი, რაც პრინციპში აქამდეც იყო ცნობილი – ევროპის კავშირმა შეაჩერა საქართველოს ევროპული ინტეგრაციის პროცესი, ამის გარდა ევროპის კავშირმა შეაჩერა 30 მლნ-ის ის ფინანსური დახმარება, რომელიც განკუთვნილი იყო საქართველოს თავდაცვის სამინისტროსთვის.
ასევე, ცნობილი გახდა ის საკითხები, რომელიც ამერიკის შეერთებული შტატების მიერ ინიცირებულ მეგობარ აქტში, რაც შეეხება საქართველოს, ეს შეეხება იმ სანქციებს, რომელსაც აშშ ამზადებს იმ პირების მიმართ, ვინც მონაწილეობდა, ხელს უწყობდა და მხარს უჭერდა რუსულ კანონს. ასეთადვე არის მოხსენიებული რუსული კანონი ამ დოკუმენტში.
ერთი რამ, რომ განვმარტოთ – საქართველოს საერთაშორისო დახმარება, რომელიც ჩვენი საერთაშორისო პარტნიორებიდან მოდიოდა საქართველოში, ძალიან დიდი ნაწილი იყო პირდაპირი გადარიცხვები საქართველოს ბიუჯეტში, ეს არის ის ფული, რომელიც დააკლდება საქართველოს თითოეულ მოქალაქეს.
ის ფული, რომელიც 30 მლნ, რომელიც არ ჩაერიცხება საქართველოს თავდაცვის სამინისტროს იყო განკუთვნილი საქართველოს თავდაცვის, საქართველოს მედეგობის, გაძლიერებისთვის.
ეს აღნიშნული ფაქტები ცხადყოფს იმას, რომ ,,ქართული ოცნების’’ საქართველოს ხელისუფლებაში ყოფნის ყოველი დღე არის საქართველოს დასუსტება, არის საქართველოს თავისუფლებისთვის და დამოუკიდებლობისთვის საფრთხე.
საქართველოს ევროპული ინტეგრაცია უკვე დადასურებულად აქვს შეჩერებული ევროპის კავშირს. ზუსტად ამიტომ ალტერნატივა არ აქვს ერთიანობას, ერთიანობით 26 ოქტომბერს ჩვენ უნდა დავამარცხოთ ,,ქართული ოცნება’’ იმისთვის, რომ საქართველო გახდეს მშვიდობის, უსაფრთხოების, სოციალური დაცულობის, კეთილდღეობის სივრცის ნაწილი’’, – განაცხადა გია ჯაფარიძემ.
ავტორი
მარიამ ხაჩირაშვილი
