დიმიტრი ხუნდაძემ ჯანდაცვის კომიტეტის ახალ ინიციატივასთან დაკავშირებით ბრიფინგი გამართა. სიახლის თანახმად შემწეობის მიმღებ ოჯახებს, გადამოწმების პერიოდში, შემწეობა ახალი დასკვის დადებამდე არ გაუუქმდებათ. ამ სიახლის განსახორციელებლად საჭიროა გამოიყოს დამატებით 5.4 მილიონი ლარი. ხუნდაძის განცხადებით კონსულტაციები გავლილია შესაბამის უწყებასთან საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროსთან:
„ქვეყანაში სოციალურად დაუცველი ოჯახებისათვის მოქმედებს დახმარების პროგრამა, რომლითაც სარგებლობს დაახლოებით 430 000 მოქალაქე, მათ შორის ბავშვები. მიზნობრივი სოციალური დახმარების პროგრამა არსებულ გამოწვევებზე საპასუხოდ პერიოდულად საჭიროებს გარკვეულ დასაბუთებულ ცვლილებებს.
დღეის მდგომარეობით გადამოწმების დროს, რაც, ასევე აუცილებელი პროცედურაა სტატუსის მატარებელ ოჯახებს დროებით უჩერდებათ დახმარება. მიუხედავად იმისა, რომ უდიდეს ნაწილს განაცდური უნაზღაურდებათ სრულად, მაინც მძიმეა მათთვის ეს პერიოდი, რადგან ისინი ბედის ანაბარა რჩებიან სიღარიბის პირისპირ.
ჯანდაცვისა და სოციალურ საკითხთა კომიტეტი გამოდის ინიციატივით, რომ საარსებო შემწეობის მიმღებ ოჯახებს მათი სოციალურ-ეკონომიკური გადამოწმების პერიოდში არ შეუჩერდეთ საარსებო შემწეობის მიღება. შემდეგ კი გადამოწმების შედეგად მინიჭებული საერიტინგო ქულიდან გამომდინარე გაგრძელდეს ან შეწყდეს მათი პროგრამაში მონაწილეობა. ამისათვის საჭიროა დამატებით 5,4 მილიონი ლარი წელიწადში.
ამ გადაწყვეტილებით ოჯახებს გადამოწმების პერიოდშიც ახალი სარეიტინგო ქულის მინიჭებამდე უწყდებოდათ საარსებო შემწეობა, ახალი ინიციატივით კი მათ ეს შემწეობა არ შეუწყდებათ. ეს იქნება მოსახლეობის საკეთილდღეოდ გადადგმული კიდევ ერთი ნაბიჯი და მისი განხორციელებით რისკის ქვეშ არ დადგება საარსებო შემწეობის მიმღები მოსახლეობის სოციალური მდგომარეობა.
ინიციატივასთან დაკავშირებით კონსულტაციები გავლილია შესაბამის უწყებასთან საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროსთან. გადაწყვეტილება მიღებულია, ცვლილება ძალაში შევა მიმდინარე წლის აპრილიდან,“ – განაცხადა დიმიტრი ხუნდაძემ.
ავტორი
თამთა ასლანიშვილი