„აწარმოე საქართველოს“ ფარგლებში წლიური ანგარიშისა და სამომავლო გეგმების პრეზენტაციის გახსნისას სიტყვით გამოვიდა საქართველოს ეკონომიკისა და მდგრადი განვითარების მინისტრი ნათია თურნავა. ღონისძიების ფარგლებში ყურადღება გამახვილდა ამ პროექტის მნიშვნელობასა და მიღწეულ შედეგებზე:
„2014 წლიდან მოყოლებული, პროგრამის ფარგლებში მხარდაჭერილია 500-მდე ქართული საწარმო, 350-მდე მცირე სასტუმრო, 6200 ოჯახზე მეტმა მიიღო მიკროგრანტები და შეძლო მცირე საოჯახი ბიზნეს საქმიანობის დაწყება მთელი საქართველოს მასშტაბით. 1 მლრდ ლარზე მეტი ინვესტიცია განხორციელდა ამ პროგრამის მხარდაჭერით. რაც მთავარია შეიქმნა 16 500-ზე მეტი ახალი სამუშაო ადგილი მთელ საქართველოში, ქალაქებსა და რეგიონებში.
2019 წელი მთლიანობაში იყო პოზიტიური მთლიანად საქართველოს ეკონომიკისთვის, რადგან ჩვენი ეკონომიკა გასულ წელს გაიზარდა მაღალი ტემპით, და ამ ნიშნით საქართველო უსწრებს რეგიონის მრავალ ქვეყანას, განსაკუთრებით დადებითად ვითარდებოდა ექსპორტი, რომელიც ასევე მაღალი ტემპით გაიზარდა. მე ბედნიერი ვარ, რომ ეკონომიკურ წარმატებაში თავისი წვლილი შეიტანეს ჩვენი პროგრამის ბენეფიციარებმა, იმ საწარმოებმა, ვინც სწორედ ჩვენი პროგრამის დახმარებით შეძლეს ამოქმედება, შეძლეს თავისი პროდუქციის ექსპორტზე გატანა თუ ადგილობრივი ბაზრისთვის შეთავაზება,” – განაცხადა ნათია თურნავამ.
ეკონომიკისა და მდგრადი განვითარების სამინისტროს სააგენტოს „აწარმოე საქართველოს“ ხელმძღვანელ მიხეილ ხიდურელის თქმით საქართველოში გაზრდილია საერთაშორისო ვიზიტორთა რაოდენობა და საჭიროა სწრაფად განვითარდეს ტურისტული ინფრასტრუქტურა.
მიხეილ ხიდურელმა აქცენტი გააკეთა სააგენტოს საქმიანობაზე და განაცხადა, რომ „სააგენტო მუშაობს 3 ძირითადი მიმართულებით. პირველი ბიზნესის განვითარების სხვადასხვა პროგრამები, მაგალითად „უმასპინძლე საქართველოში“, „აწარმოე საქართველოში,“ „გადაიღე საქართველოში“. მეორე მიმართულება, რომელზეც ვმუშაობთ ეს არის ექსპორტის მხარდაჭერა. მესამე მიმართულება ინვესტიციების მოზიდვა „invest in georgia“-ს ბრენდის ქვეშ.“
2019 წელს 59 სასტუმრო იქნა მხარდაჭერილი, ეს არის უპრეცედენტო 48 პროცენტიანი ზრდა ფაქტიურად ძალიან ბევრი სასტუმრო დაფინანსდა, ჯამური ინვესტიცია 38 პროცენტით არის გაზრდილი. რაც ყველაზე მთავარია 2014-დან 2019 წლამდე საქართველოში ამ პროგრამის მეშვეობით დაემატა ახალი სასტუმრო ოთახები, რომლის რაოდენობა 3850 შეადგენს.
„მე მგონი ეს პროგრამა განსაკუთრებულად დროული და ადეკვატურია თუ გავითავლისწინებთ იმას, რომ საქართველოში გვაქვს მზარდი ტურისტული ტრენდი, შემოდის ბევრი საერთაშორისო ვიზიტორი და ჩვენ დროულად გვჭირდება ბევრი ტურისტული ინფრასტრუქტურის შექმნა“, – აცხადებს მიხეილ ხიდურელი.
პრეზენტაცია საწარმო “მეამაში” გაიმართა, რომელიც აგრეთვე ამ პროექტის ფარგლებში იყო დაფინანსებული, ქართული კომპანია “მეამა” ერთადერთია, რომელიც როგორც ევროპული, ასევე ამერიკული ყავის კაფსულებს აწარმოებს.
საწარმო “მეამაში” გამართულ პრეზენტაციას დიპლომატიური კორპუსის, ხელისუფლების, ბიზნესის სფეროს, საჯარო თუ კერძო სექტორის წარმომადგენლები ესწრებოდნენ.
ავტორი
თამთა ასლანიშვილი