სამშაბათი, ივლისი 23, 2024

“რუსულ კანონს არაფერი აქვს საერთო დემოკრატიასთან, უფრო მეტიც პირდაპირ ეწინააღმდეგება ადამიანის უფლებების დაცვის ევროპულ სტანდარტებს” – პაატა მანჯგალაძე ეუთო/ოდირის დასკვნასთან დაკავშირებით

საქართველოს პარლამენტის წევრი, ,,სტრატეგია აღმაშენებლის” გენერალური მდივანი პარლამენტში გამართულ ბრიფინგზე, ,,უცხოური გავლენის გამჭვირვალობის კანონზე” ეუთო/ოდირის დასკვნასთან დაკავშირებით, განმარტებებს აკეთებს:

,,ჩვენი მიმართვის საფუძველზე ჩამოვიდა ეუთო-ოდირის დასკვნა, რომელიც პირდაპირ ამბობს, რომ ამ კანონს ე.წ. რუსულ კანონს არაფერი აქვს საერთო დემოკრატიასთან, უფრო მეტიც, პირდაპირ ეწინააღმდეგება ადამიანის უფლებების დაცვის ევროპულ სტანდარტებს.

ამ დასკვნაში, ამ შეფასებაში გაბათილებულია ,,ქართული ოცნების’’ ყველა არგუმენტი, თითქოს მათი მიზანი იყო გამჭირვალობა, თითქოსდა სხვა რამეს არ ისახავდა მიზნად. აქ დეტალურად არის აღწერილი, რომ ამ კანონს, ამ მართლა რუსულ კანონს არაფერი აქვს საერთო არც ამერიკულ ფარასთან, არც ავსტრალიურ კანონთან, რომელზეც იყო საუბარი და პირდაპირ არის საუბარი, რომ დაფინანსების წყაროს მიხედვით, ადამიანის უცხოეთის სამსახურში მყოფად ან აგენტად გამოცხადება არ შეესაბამება ევროპულ სტანდარტებს.

ასევე გაბათილებულია არგუმენტები გამჭირვალობასთან დაკავშირებით იმიტომ, რომ ეს არ არის მიზნის მიღწევის საშუალება და შემოთავაზებულია – თუ სხვა საკითხები არის დაკავშირებული უსაფრთხოებასთან უნდა შევიდეს შესაბამის კანონში და არ უნდა მოხდეს ადამიანების სტიგმატიზება.

კიდევ ერთხელ ვამბობ, ,,ქართული ოცნება’’ სპეკულირებდა, რომ არ არსებობდა სამართლებრივი არგუმენტები, უამრავი სამართლებრივი არგუმენტია ამ დასკვნაში იმასთან დაკავშირებით, რომ არ შეიძლება ამ კანონის მიღება, ისეთ ქვეყანაში, რომელსაც უნდა გახდეს ევროპის ოჯახის წევრი’’,- განაცხადა პაატა მანჯგალაძემ.

ავტორი
მარიამ ხაჩირაშვილი

კომენტარები - დატოვეთ თქვენი მოსაზრება

კვირის სხვა თემები

All

პოპულარული დღეს

ბოლო გამოქვეყნებული