„ისინი ამბობენ, რომ მხარს უჭერენ საქართველოს მოქალაქეების გულწრფელ სურვილს გავხდეთ ევროკავშირის და ცივილიზებული სამყაროს წევრი და ისინი ვერასდროს ვერ შეეგუებიან და არ დაუშვებენ, რომ ეს ნება გააყალბოს „ქართულმა ოცნებამ“ და რუსული მიმართულებით წაიყვანოს ქვეყანა“, – ამის შესახებ „სტრატეგია აღმაშენებლის“ თავმჯდომარემ გიორგი ვაშაძემ აშშ-ს კონგრესმენების მხრიდან გავრცელებულ წერილთან დაკავშირებით განაცხადა.
ოპოზიციონერი ლიდერის თქმით საქართველოს პარტნიორები პირდაპირ მიუთითებენ იმის შესახებ, რომ თუ მმართველი გუნდი ამ კანონს მიიღებს, მყისიერად ამოქმედდება სანქციები ყველა იმ პირის მიმართ, ვინც ჩართულია ამ კანონის მიღებასა და იმ ძალადობრივ ქმედებებში რაც რამდენიმე კვირაა გრძელდება:
„ქართველი ხალხის ესმის მთელ მსოფლიოს, მაგრამ, სამწუხაროდ, არ ესმის ხელისუფლებას, რომელიც დღეს საქართველოში არის. დიახ, ამის დასტურია აშშ-ს კონგრესმენების მკაფიო, მკვეთრი და ძალიან მნიშვნელოვნი გზავნილი, რომელიც ჩვენ მივიღეთ.
ისინი ამბობენ, რომ მხარს უჭერენ საქართველოს მოქალაქეების გულწრფელ სურვილს გავხდეთ ევროკავშირის და ცივილიზებული სამყაროს წევრი, რომ ისინი ვერასდროს შეეგუებიან, არ დაუშვებენ, ეს ნება გააყალბოს „ქართულმა ოცნებამ“ და რუსული მიმართულებით წაიყვანოს ქვეყანა.
პირდაპირ საუბრობენ სანქციებზე. სანქციები ემუქრება არა მხოლოდ ბიძინა ივანიშვილს, არამედ ყველა იმ ადამიანს ვინც ხელს მოაწერს ამ მოღალატეობრივ აქტს. მათ შორის ყველა იმ პარლამენტარს, ვინც მხარს დაუჭერს რუსულ კანონს და ფაქტობრივად ამით საკუთარ თავს დაადებს სანქციებს.
ამიტომ კიდევ ერთხელ ყველა პარლამენტარს, ყველა პოლიციელს, რომელიც დღენიადაგ უკანონოდ იქცევა, მოვუწოდებ, – დაფიქრდით! თქვენ კონკრეტული პასუხისმგებლობა დაგეკისრებათ იმ დანაშაულ ქმედებებზე, რომელსაც ახლა ჩადიხართ.
ამ წერილში ხაზგასმით არის ნათქვამი იმ ძალადობის ფაქტებზე, რომელსაც სჩადის პოლიცია და ის ძალადობრივი ჯგუფები, რომლებიც დაორგანიზებულია „ქართული ოცნების“ მხრიდან.
ხაზგასმითაა საუბარი ლევან ხაბეიშვილზე და ასევე იმ მშვიდობიან მომიტინგეებზე თავდასხმებზე, რამაც მთლიანად ახადა ფარდა ძალადობრივ რეჟიმს, რომელიც ქუჩებში უსწორდება საქართველოს მოქალაქეებს პოლიციის ან ვაიპოლიციის ხელით.
აქედან გამომდინარე, გზა არის ძალიან კონკრეტული, ჩვენ ყველანი უნდა ვიდგეთ ერთად. მთელი მსოფლიო არის ჩვენს გვერდით, ჩემო ძვირფასებო“, – განაცხადა ვაშაძემ.
ინფორმაციას პოლიტიკური პარტია “გიორგი ვაშაძე – სტრატეგია აღმაშენებლის” და საპარლამენტო ფრაქცია “რეფორმების ჯგუფის” მედიასთან და საზოგადოებასთან ურთიერთობის სამსახური ავრცელებს
