,,გამარჯვების კოალიციის” ერთ-ერთი ლიდერი, პარტია ,,ერთიანი ნაციონალური მოძრაობის” თავმჯდომარე, ლევან ხაბეიშვილი პარტიის ოფისში გამართულ ბრიფინგზე კომენტარს აკეთებს დაკავებებისა და ძალადობის ფაქტებთან დაკავშირებით:
,,მინდა სოლიდარობა გამოვუცხადო ყველას, ვისაც ფაქტობრივად ოჯახებში, სახლებში უვარდებიან და ფიზიკურად უსწორდებიან ისე, როგორც მათ ჩვევიათ ლაჩრულად, მიპარვით, რამდენიმე ადამიანისგან, დაორგანიზებული ჯგუფური ძალადობებით.
ასევე არ შემიძლია არ გამოვეხმაურო ,,ტვ პირველთან’’ განვითარებული მოვლენებს, როცა ფაქტობრივად აღიარებს სისტემა, რომ არ არსებობს არანაირი სამართალდამცავი ორგანო, არ არსებობს არანაირი პოლიცია და ეს ყველაფერი ცხადია, შეთანხმებულად, გომელაურის, ხარაზიშვილის, ივანიშვილის დავალებით ხდება.
ასევე ძალიან მნიშვნელოვანია საზოგადოებას ესმოდეს, რომ ცინიზმის მწვერვალია, ჩემო ძვირფასებო, ხალხზე ზრუნვის სახელით, თურმე ეს კანონი ხალხს სჭირდება და ხალხის გამო, ხალხს რომ სჭირდება ამიტომ დასდევენ ქუჩებში ადამიანებს, ამიტომ სცემენ ახალგაზრდებს, უვარდებიან ოჯახებში, ამიტომ ურეკავენ პენსიონერ დედებს, მშობლებს, პატარა ბავშვებს, აგინებენ, ლანძღავენ და აშინებენ, რომ თქვენ შვილს მოგისვენებთ და ვიღაცას დავჭრით და მოვკვლავთ და ავკუწავთ, ეს ყველაფერი ხალხზე ზრუნვა ყოფილა.
ახლა რაც შეეხება კიდევ უფრო მნიშვნელოვანს – დღეს ჩვენი ინფორმაციით დაახლოებით 4-5 საათისთვის კანცელარიაში დაბარებული ჰყავთ ბიზნესმენები. ეს ბიზნესმენები დაიბარეს იმიტომ, რომ ვისაც ჯერ არ გამოუხატავს მხარდაჭერა, აიძულონ დაიცვან რუსული კანონი, მხარი დაუჭირონ და უარი თქვან ევროპაზე. შესაბამისად, გვაქვს ინფორმაცია, რომ ამ ბიზნესმენებს მოსთხოვენ და დაავალებენ, რომ მათი ოჯახის წევრები, შვილები, მეუღლეები, დები, ძმები, ნათესავები, რომლებიც აქტიურად დადიან რუსული კანონის საწინააღმდეგო აქციაზე, აღარ იარონ. წინააღმდეგ შემთხვევაში მათ შეექმნებათ პრობლემები და ასევე, ამ ბიზნესმენებს დღეს აპირებენ მოსთხოვონ, რომ მათ დაქვემდებარებაში მყოფი თანამშრომლები და საქართველოს მოქალაქეები, რომლებიც ცხადია, დადიან ,,არა რუსულ კანონს და კი ევროპას’’ მშვიდობიან მანიფესტაციებში იღებენ მონაწილეობას, უნდათ რომ ამ ბიზნესმენებს უთხრან აიძულონ მისი თანამშრომლები, რომ არავინ აქციაზე არ წავიდნენ.
მე მინდა მივმართო ყველა იმ ბიზნესმენს, რომლებიც დღეს იქნებიან შეხვედრაზე- უნდა გესმოდეთ, რომ საქართველოს ეკონომიკა დგას დასავლეთზე, ევროპაზე თქვენი ბიზნესების უდიდესი ნაწილი პირდაპირ დაკავშირებული და მიბმულია დასავლეთზე და ევროპაზე, უნდა გესმოდეთ, რომ დღეს არის გადამწყვეტი დრო, როცა თქვენ მარტივი რჩევანი უნდა გააკეთოთ ივანიშვილსა და საქართველოს შორის’’, – განაცხადა ლევან ხაბეიშვილმა.
ავტორი
მარიამ ხაჩირაშვილი
