“საჯარო სექტორში – “ქოცობაც” და “ნაცობაც”, ერთხელ და სამუდამოდ, უნდა დასრულდეს” – გიორგი გახარია

ყოფილი პრემიერ-მინისტრი, პარტია ,,საქართველოსთვის” თავმჯდომარე, გიორგი გახარია YouTube-ის საკუთარ პლატფორმაზე, გადაცემა ,,გახარიას კვირაში” საჯარო სექტორში მომუშავე პერსონალს მიმართავს:

,,მე მინდა, საჯარო მოხელეებს, პირველ რიგში, მოვუწოდო, ემსახურონ სახელმწიფოს და არა პარტიას. მინდა, მათ იცოდნენ, რომ პირველი, რაც საქართველოს პოლიტიკურ სისტემას დღეს სჭირდება, საჯარო სექტორში – ,,ქოცობაც” და ,,ნაცობაც”, ერთხელ და სამუდამოდ, უნდა დასრულდეს.

მე ვიცი, რამდენი აქვს ამ ხალხს ნაშრომი იმისთვის, რომ ჩვენ ასე ახლოს მივსულიყავით ევროკავშირთან. ყველაზე დიდი ამორალურობა არის ის, რომ პოლიტიკური ხელმძღვანელობა დღეს სახელმწიფოსი საჯარო სექტორს აშანტაჟებს – ელემენტარული, სამუშაო ადგილით და ხელფასით.

მე მესმის მათი მორალური დილემა დღეს. მინდა მოვუწოდო მათ, ყველაფერი გააკეთონ იმისთვის, რომ ქვეყნის ევროპული პერსპექტივა არ დაზიანდეს. ყველფერი უნდა გააკეთონ იმისთვის, რომ 2024 წლის არჩევნებში მათ სწორი არჩევანი გააკეთონ, რომ ერთხელ და სამუდამოდ ამ ქვეყანამ პოლიტიზირებული საჯარო სექტორი უნდა დაუტოვოს ისტორიას. სხვანაირად ჩვენ სახელმწიფოს ვერ ავაშენებთ. ამიტომ, მათ სწორი გადაწყვეტილება უნდა მიიღონ”, – განაცხადა გიორგი გახარიამ.

ავტორი
ნინი ხიჯაკაძე