“ეს კანონი არც გაშორებს ევროკავშირს და არც გაახლოებს, ეს პოლიტიკურ ნებაზეა დამოკიდებული! მიგვიღებთ-მიგვიღებთ, არ მიგვიღებთ-არ მიგვიღებთ” – მეუფე იაკობი “უცხოური გავლენის გამჭვირვალობის შესახებ” კანონპროექტზე

ბოდბელი ეპისკოპოსი, მეუფე იაკობი (იაკობიშვილი) მედიასთან კომენტარს აკეთებს ,,უცხოური გავლენის გამჭვირვალობის შესახებ” კანონპროექტის დაინიცირებასთან დაკავშირებით:

,,ატყდა ამბავი, ზოგი შეშფოთდა, მაგალითად, ზოგი – NATO-ს გენერალურ მდივანზე ვიტყვი, იმან ,,ვეწინააღმეგებიო”. შე დალოცვილო, შენამდე რომ NATO-ს გენერალური მდივნები იყვნენ, მივეღეთ საქართველო რა მაშინ!

ევროპის ქვეყნები რომ წუხდებიან, თვითონ ხომ იციან, რომელი გვბლოკავდა, რომ არ შევსულიყავით? ევროკავშირისკენ რომ აღარ გაგვეხედა?! მივეღეთ და დღეს ხომ ამდენ კანონებზე და რაღაცებზე საუბარი ხო არ გვექნებოდა?! ჩვენც ვიქნებოდით ისე.

ახლა გვაცადეთ, ჩვენს ქვეყანას მივხედავთ. მადლიერები ვართ რასაც აკეთებთ, მაგრამ ჩვენი ქვეყანა დღევანდლამდე ჩვენი მოტანილია და არავინ დაგვაყვედროს.

კეთილი ინებონ და როგორებიც ვართ, ისეთები მიგვიღონ. თავიანთ ქვეყანაში, ვისაც რა უნდა, ის კანონი მიიღოს. ჩვენსას ჩვენ მივხედავთ.

ეს კანონი თურმე საშიში ყოფილა… ეს კანონი არც გაშორებს ევროკავშირს და არც გაახლოებს, ეს პოლიტიკურ ნებაზეა დამოკიდებული. მიგვიღებთ-მიგვიღებთ, არ მიგვიღებთ-არ მიგვიღებთ.

პოლიტიკოსებს რომ უყურებთ, სულ ისე არიან, თუთიყუშები არიან – ,,რუსეთი, რუსეთი, რუსული კანონი” იძახიან და ამ დროს თვითონ არიან შინაგანად რუსები…”, – განაცხადა მეუფე იაკობმა.

ავტორი
ნინი ხიჯაკაძე