“გაკოტრებულია პოლიტიკურად ძალიან უჭირს, მოგება კი არა 40%-ანი ბარიერის ეშინია” – პაატა მანჯგალაძე მმართველ პარტიაზე

საქართველოს პარლამენტის წევრი, ,,სტრატეგია აღმაშენებლის” გენერალური მდივანი, პაატა მანჯგალაძე კომენტარს აკეთებს საარჩევნო კოდექსში დაგეგმილ მორიგ ცვლილებებთან და ტერმინ ,,დელეგატის” დამკვიდრებასთან დაკავშირებით:

,,გაკოტრებულია პოლიტიკურად ძალიან უჭირს, მოგება კი არა 40%-ანი ბარიერის ეშინია.

,,დელეგატი” კი მოიგონეს იმისთვის, რომ პოლიტიკურად ჰყავთ ე.წ. ,,ფულის ტომრები”, ყოფილი მაჟორიტარები, რომლებსაც უნდათ, რომ ფუნქცია მისცენ ანუ პარტიის ფულის გარდა კიდევ, რომ დაახარჯინონ ფული, ეს არის რაღაც ფიქციის შექმნა, რომ თითქოს ისევ მაჟორიტარები არიან და ეს სისტემა ქართველმა ერმა გააუქმა“, – განაცხადა პაატა მანჯგალაძემ.

ინფორმაციისთვის: მმართველი გუნდის მიერ პარლამენტში ინიცირებული საარჩევნო კოდექსში ცვლილებების პროექტის თანახმად:

• მაჟორიტარული სისტემით საკრებულოში ასარჩევად 40%-იანი ბარიერი უქმდება და არჩეულად ჩაითვლება ის კანდიდატი, რომელიც სხვებზე მეტ ნამდვილ ხმას მიიღებს;

• პარტიას უფლება აქვს, პარტიული სიის შედგენისას საარჩევნო ოლქის (ოლქების) ტერიტორიაზე რეგისტრირებულ ამომრჩეველთა დელეგატად განსაზღვროს პარლამენტის წევრობის კანდიდატი. პარლამენტის წევრობის კანდიდატი შესაძლებელია განისაზღვროს მხოლოდ ერთი საარჩევნო ოლქის ტერიტორიაზე რეგისტრირებულ ამომრჩეველთა დელეგატად. ამ შემთხვევაში პარტიულ სიაში პარლამენტის წევრობის კანდიდატის გასწვრივ მიეთითება იმ საარჩევნო ოლქის ნომერი, რომელი საარჩევნო ოლქის ტერიტორიაზე რეგისტრირებულ ამომრჩეველთა დელეგატადაც არის წარდგენილი.

ავტორი
მარიამ ხაჩირაშვილი