“რატომ არ არეგისტრირებენ საკონსულო აღრიცხვაზე ადამიანებს, რომლებსაც უმუშევრობის, ფასების გაზრდის, მძიმე ეკონომიკური ვითარების გამო უწევს ქვეყნიდან წასვლა – გიორგი ვაშაძე

,,გამარჯვების პლატფორმის” ერთ-ერთი ლიდერი, ,,სტრატეგია აღმაშენებლის” თავმჯდომარე, პარლამენტის დეპუტატი გიორგი ვაშაძე კონკრეტულ ინფორმაციას ავრცელებს და მწვავე შეფასებებს აკეთებს ემიგრანტებისთვის პრობლემების შექმნასთან დაკავშირებით, როცა საკონსულო აღრიცხვაზე არ აყენებენ მათ და ამით ეზღუდებათ არჩევნებში მონაწილეობის უფლება:

,,სამწუხაროდ, ემიგრანტების სამართლიან კითხვაზე – რატომ არ არეგისტრირებენ საკონსულო აღრიცხვაზე ადამიანებს, რომლებსაც უმუშევრობის, ფასების გაზრდის, მძიმე ეკონომიკური ვითარების გამო უწევს ქვეყნიდან წასვლა – ეს პროვოკაციები და ეს ხმაური არის.

მე ხელში მაქვს წერილები, რაც მარტო მე პირადად გადავუგზავნე საგარეო საქმეთა სამინისტროს, არაერთი წერილი, რომელშიც ვთხოვ ერთ რამეს, რომ – რატომ არ არეგისტრირებთ ამ ადამიანებს საკონსულო აღრიცხვაზე?! მაგალითად, ნიუ-იორკის საკონსულოს, ჩვენ რაც ვიცით, 52 განაცხადზე არ აქვს პასუხი.

მაგრამ მთავარი რა არის იცით?! ამ ადამიანებს, ემიგრანტებს, ,,ქართული ოცნება’’ ეძახის გამოგონილ ადამიანებს. 800 000-ზე მეტმა ჩვენმა თანამემამულემ ქვეყანა დატოვა მათი მმართველობის დროს – გაჭირვების, უმუშევრობის, ძალიან მძიმე სოციალური პირობების გამო. იმისთვის, რომ ელემენტარულად ოჯახები არჩინონ.

ესენი რას აკეთებენ – ყვირიან, უზრდელობენ და საზოგადოებას ვეკითხები – ხედავთ ვინ არის ხელისუფლებაში?! ამ ადამიანებმა ევროკავშირში როგორ უნდა შეიყვანონ ქვეყანა?! კიდევ ერთხელ ვამბობ, მათაც გადავეცი წერილები და ხელში მაქვს ადამიანების წერილები, თავისი ინდივიდუალური განაცხადებით, ფოტო-სურათებით, იმ ადამიანების, რომლებსაც არ არეგისტრირებენ საკონსულო აღრიცხვაზე.

რატომ?! იმიტომ, რომ ყველა არჩევნები ტოტალურად წააგეს უცხოეთში და ახლა არ უნდათ, რომ ხმის უფლებაც კი მისცენ ადამიანებს, რომლებიც მათი უსამართლო ქმედების გამო ქვეყნიდან წავიდნენ. ან რა ლოგიკაა, რომ მილიონზე მეტმა ადამიანმა, 50 საარჩევნო უბანზე უნდა მიიღოს მონაწილეობა. როგორ შეიძლება, რომ 50 უბანზე მილიონმა კაცმა მისცეს ხმა?

წერილების მეორე ნაწილი, რომლებსაც არ პასუხობენ არის წერილები სწორედ ამაზე, რომ ითხოვენ 15 ქალაქიდან არის შემოსული წერილი, რომ ითხოვენ საარჩევნო უბნების გახსნას. ამაზეც პასუხს არ სცემენ…’’, – განაცხადა გიორგი ვაშაძემ.

ავტორი
მარიამ ხაჩირაშვილი