„ახალი საქართველოს“ თავმჯდომარე გიორგი ვაშაძემ იუსტიციის სახლში „ონკოლოგიის მართვის ცენტრი“ დაარეგისტრირა. ცენტრი საზოგადოებას ონკოლოგიური დაავადების შესახებ ინფორმაციას მიაწვდის. როგორც ოპოზიციონერი ლიდერი აღნიშნავს, ამ ცენტრის მეშვეობით ისინი მთელ საქართველოში დაიწყებენ კამპანიას და ლობირებას, რათა საბიუჯეტო სახსრებმა ყველა პაციენტის მკურნალობა სრულად, 100%-ით დაფაროს.
„ეს ცენტრი 22 თებერვალს ქართველ და უცხოელ ექიმებთან ერთად სახელმწიფოს კომპლექსურ სტრატეგიას შესთავაზებს თუ როგორ უნდა ვებრძოლოთ სიმსივნურ დაავადებებს, რომელიც სამ მთავარ პრინციპს ეფუძნება:
- პრევენცია;
2. ადრეული დიაგნოსტიკა;
3. უმაღლესი ხარისხის მკურნალობა და მოვლა აქ ადგილზე, საქართველოში, რომელიც სახელმწიფომ სრულად უნდა აიღოს საკუთარ თავზე.
ცენტრს ჯანდაცვის პოლიტიკის სპეციალისტი, სერგო ჩიხლაძე უხელმძღვანელებს. ამ ცენტრის მეშვეობით ჩვენ მთელ საქართველოში დავიწყებთ კამპანიას და ლობირებას, რათა საბიუჯეტო სახსრებმა 100%-ით დაფაროს სრულად ყველა პაციენტის მკურნალობა. ჩვენ მნიშვნელოვნად ჩამოვრჩებით ევროპის განვითარებულ ქვეყნებს პრევენციის და ადრეული დიაგნოსტიკის საკითხებში.
სიმსივნის გვიან სტადიებზე, მე-3 და მე-4 სტადიაზე აღმოჩენა ჩვენთან 40%-ია, ხოლო ზოგიერთი სიმსივნის შემთხვევაში, მაგალითად ფილტვის კიბოს შემთხვევაში, 60% აღმოჩენა ხდება ძალიან გვიან, მე-4 სტადიაში. ასევე, დიაგნოზის დასმიდან ხუთ წლიანი გადარჩენის მაჩვენებელი, ჩვენთან, 3-ჯერ უარესია ევროპის ქვეყნებთან შედარებით.
ამავე დროს, ჩვენ გვყავს მაღალი დონის სპეციალისტები, ექიმები, ონკოლოგები და გვაქვს საკმაოდ კარგად აღჭურვილი კლინიკები, რაც საფუძველს ქმნის, რომ კიდევ უფროს წრაფად და ეფექტურად განვითარდეს ეს დარგი. მიუხედავად, ამისა სიმსივნის მკურნალობა კვლავ მძიმე ფინანსური ტვირთია მოსახლეობისთვის. პაციენტების ნაწილი კი საზღვარგარეთ ეძებს შველას და კიდევ უფრო ღარიბდება.
სწორედ ამიტომ საჭიროა ამ დარგის მართვის მექანიზმების გაუმჯობესება, ახალი ტექნოლოგიების და მიდგომების მასიურად შემოტანა, სახელმწიფო პროგრამების დახვეწა, დაფინანსების მექანიზმების ოპტიმიზაცია და ყველაფრის პაციენტზე ორიენტაცია.
ასე, რომ დადგა დრო ყველანი გავერთიანდეთ და ეს მართლაც უმძიმესი დაავადება ყველამ ერთად დავამარცხოთ.
როგორც კვლევები და ზოგადად მედიცინის განვითარება აჩვენებს, ალბათ უახლოეს მომავალში მსოფლიოში იქნება მედიკამენტი და მეთოდები, რომლითაც საბოლოოდ განკურნება იქნება შესაძლებელი. სწორედ ამიტომ, ჩვენ უნდა ვიდგეთ ამ განვითარების ავანგარდში, რომ საქართველოს მოსახლეობამ ერთერთმა პირველმა ისარგებლოს მედიცინის და მეცნიერების ამ უახლესი მიღწევებით”, – განაცხადა გიორგი ვაშაძემ.
