ყოფილი პრემიერ-მინისტრი, პარტია ,,საქართველოსთვის” თავმჯდომარე, გიორგი გახარია YouTube-ის საკუთარ პლატფორმაზე, გადაცემა ,,გახარიას კვირაში” პოზიციას აფიქსირებს წინასაარჩევნო პერიოდში ოპოზიციური პარტიების შესაძლო გაერთიანებასთან დაკავშირებით:
,,ყველა ის პარტია, რომელიც თავის თავს ვერ იპოვის ამ პოლიტიკურ ველზე და ალოგიკურად, გონივრულობის მიღმა გააგრძელებს ქმედებას, მათ მოუწევთ [გაერთიანება]. საერთოდ, ფასეულობების ირგვლივ გაერთიანებაში პრობლემა არანაირი არ არის, ვიღაცის წინააღმდეგ გაერთიანებაა ცოტა პრობლემური.
ვინც ვერ ჩამოაყალიბებს თავის თავს, მემარჯვენეა, მემარცხენეა, ბანკირების და ელიტების პარტიაა, სოციალისტების პარტიაა თუ მუშათა კლასის… ვინც ვერ ჩამოყალიბდება, საერთოდ რისთვის იბრძვის, რა უნდა ან ცხოვრებაში, ან პოლიტიკაში, ვის რას უმტკიცებს, მათ ყველას მოუწევთ მისვლა იქ, სადაც იდეოლოგიურად, მეტ-ნაკლებად, ახლოს არიან.
თუ ეს პატარა პარტიები თავიანთ იდენტობაზე არ იფიქრებენ, არ იფიქრებენ პოზიტიური დღის წესრიგის შექმნაზე, ცოტა უფრო მეტ ლოგიკას არ გამოკვეთენ და ასეთი აგრესიულები იქნებიან, მათ საბოლოო ჯამში, მოუწევთ მისვლა. თუ ისინი რისკს დაინახავენ და ეს მოხდება, რომ 5%-ს ვერ აგროვებენ – ჯობია, რომ მივიდნენ, უნდა მივიდნენ. წინააღმდეგ შემთხვევაში, ეს დაკარგული ხმები იქნება დამატებითი სარგებელი ,,ოცნებისთვის”, რაც ჩვენ, არავის არ გვჭირდება.
აქედან გამომდინარე, ან თავიანთ იდენტობაზე უნდა იფიქრონ, ცოტა უფრო ლოგიკურად მოიქცნენ, ან მათ მოუწევთ, რომ კოლექტიური ,,ნაციონალური მოძრაობის” ნაწილი გახდნენ“, – განაცხადა გიორგი გახარიამ.
ავტორი
ნინი ხიჯაკაძე
