„ახალი საქართველოს“ თავმჯდომარე, გიორგი ვაშაძე მოლაპარაკებების მეხუთე რაუნდთან დაკავშირებით მმართველი გუნდისგან ადეკვატურ პოზიციას ელოდება, რათა ევროსაბჭოს დადგენილებისამებრ საარჩევნო სისტემასთან დაკავშირებით შეთანხმება მოხდეს. ოპოზიციონერი ლიდერს მიაჩნია, რომ თუკი “ქართული ოცნება” უცხოელი კოლეგების რჩევებს არ გაითვალისწინებს, საერთაშორისო ასპარეზზე მმართველი გუნდის ლიდერების მიმართ მკაცრი შედეგები იქნება.
„სრულიად განსხვავებული სასტარტო პოზიცია არის მოლაპარაკების და დიალოგის წინ, ვხდევათ ამერიკელი კონგრესმენების, სენატორებისა და აშშ-ს მკაფიო პოზიციებს პროპორციულ საარჩევნო სისტემასთან დაკავშირებით და მეორე – ევროსაბჭოს დადგენილება, რომელმაც პირდაპირ გააკეთა იმპერატიული განსაზღვრება, რომ მოხდეს შეთანხმება საარჩევნო სისტემასთან დაკავშირებით.
ყელმოღერებული პოზიცია, როგორიც აქვს „ქართულ ოცნებას“ – “როგორც მე მინდა ისე იქნება ყველაფერი”, ასე ვერ იქნება, ფაქტია და თუ ამ შენიშვნებს და რეკომენდაციებს არ მოისმენს საერთაშორისო ასპარეზზე ძალიან მკაცრი განაჩენი ექნებათ მის ლიდერებს და წარმომადგენლებს.
აქედან გამომდინარე, ჩვენ კონსტრუქციულები ვართ და ადეკვატური პოზიცია გვინდა მოვისმინოთ “ქართული ოცნების“ მხრიდან, ჩვენ კი არ უნდა შევთავაზოთ რამე, გერმანული მოდელი, რომელიც ადეკვატურია, უკვე შევთავაზეთ, მრავალმანდატიანი მაჟორიტარული სისტემა მოვიფიქრეთ, ისინი კი მოვიდნენ 100-50-ზე ფორმულით და ჰგონიათ, რომ ჩვენ ვაჭრობაში შევალთ.
ძალიან ცდებიან, ჩვენ უკვე პრინციპული, ურყევი პოზიცია გვაქვს, იმიტომ, რომ ვფიქრობთ ქვეყნის სწორი განვითარების გამოსავალი ამაშია.
2020 წლის არჩევნების შემდეგ საქართველო სჭირდება კოალიციური მმართველობა და ქვეყანაში უნდა დავასრულოთ ერთპარტიული მმართველობა ერთხელ და სამუდამოდ“ – აცხადებს გიორგი ვაშაძე.
