თბილისში, რუსთაველის გამზირზე, პარლამენტის წინ ონკოპაციენტების მხარდამჭერი მორიგი აქცია გაიმართა. ,,კავშირი სიცოცხლისთვის’’ დამფუძნებელი, გვანცა აფხაიძე სააგენტო ,,პარალელთან’’ ინტერვიუში აცხადებს, – “ჩვენი მთავარი მოთხოვნა არის ის, რომ პაციენტებმა შეძლონ დროული და უწყვეტი მკურნალობა“:
- დღეს, დედის დღეს კიდევ ერთხელ შეიკრიბეთ, რა არის თქვენი პროტესტის მთავარი მიზანი, რა კონკრეტული მოთხოვნები გაქვთ და რა ქმედითი ნაბიჯების მოლოდინი გაქვთ ხელისუფლებისგან?
– ჩვენი მთავარი მოთხოვნა არის ის, რომ პაციენტებმა შეძლონ დროული და უწყვეტი მკურნალობა, რაც ამ პირობებში შეუძლებელია. პაციენტებს უშვებენ ბიუროკრატიულ მანქანაში და ისინი ვერ იღებენ დროულად დაფინანსებას და წამლებს იმიტომ, რომ წამლების დეფიციტია.
ჩვენ ვითხოვთ ჯანდაცვის სისტემის გამართვას. ჯანდაცვის სისტემა ახლა არის დანგრეული. პაციენტები ვერც წამალს შოულობენ, უწევთ ,,შავ ბაზარზე’’ წამლის მოძიება, 25 000 ლარიანი ლიმიტი მარტში უკვე უმრავლესობას ამოეწურა. მერე ეს ადამიანები უნდა წავიდნენ რეფერალურში, რეფერალური მოთხოვნისას ელექტრონულ ვერსიას არ იღებს ისევ უნდა შეიტანონ, ამ მხრივ რეგიონებში საშინელი სიტუაციაა იმიტომ, რომ რეგიონებიდან უწევთ ჩამოსვლა, მერე აქ რიგებია და ა.შ. ეს ყველაფერი მერე ურტყამს ჯანმრთელობას და ჩვენ ვკარგავთ უამრავ ადამიანს იმიტომ, რომ ისინი ვერ იღებენ დროულ და უწყვეტ მკურნალობას.
- გაგრძელდება თუ არა აქციები და გექნებათ თუ არა მსგავსი შეკრებები მანამ სანამ არ დაკმაყოფილდება თქვენი მოთხოვნა?
– თუ ჩვენ არ გვექნება ხელისუფლების მხრიდან გამოხმაურება, მოგვიწევს, რომ გავაგრძელოთ ისევ პროტესტი, იმიტომ, რომ ამ ბრძოლაში უბრალოდ დანებება არ შეიძლება. თუ ჩვენ დავნებდებით, ეს იმას ნიშნავს, რომ ათიათასობით ადამიანი დაიღუპება.
ავტორი
მარიამ ხაჩირაშვილი
