ყოფილი პრემიერ-მინისტრი, პარტია ,,საქართველოსთვის“ თავმჯდომარე, გიორგი გახარია YouTube-ის საკუთარ პლატფორმაზე, გადაცემა ,,გახარიას კვირაში“ პოლიტიკურ შეფასებას ახდენს და კონკრეტულ განმარტებებს აკეთებს იმასთან დაკავშირებით, თუ რატომ განაცხადა უარი, საქართველოს პრეზიდენტ სალომე ზურაბიშვილის მიერ ოპოზიციისათვის შეთავაზებულ ფორმატში, კონსულტაციებში ჩართულიყო:
,,სინამდვილეში, არაფერი მომხდარა, აბსოლუტურად. ჩვენ, როგორც აქამდე, პატივს ვცემთ პრეზიდენტის ინსტიტუტს, ვაფასებთ ყველაფერ იმას, რასაც ქალბატონი სალომე აკეთებს, განსაკუთრებით ქვეყნის ევროპული მომავლის პერსპექტივის დაახლოების კონტექსტში. კიდევ უფრო მეტად ვაფასებთ იმ შესაძლებლობებს და რესურსს, რომელიც პრეზიდენტის ინსტიტუტს და ქალბატონ სალომეს გააჩნია, არჩევნების დაცვის თვალსაზრისით. აქ საერთოდ 2 აზრი არ არსებობს.
ჩვენ, მიუხედავად იმისა, რომ არანაირი სირთულე ამ გაერთიანებების თვალსაზრისით, აზრის გამოთქმაში არ გვაქვს იმიტომ, რომ დიდი ხანია უკვე ვამბობთ, რომ 2024 წლის არჩევნებისთვის, პარტია ,,საქართველოსთვის“ არ გაუერთიანდება არავის, წერტილი! სამწუხაროდ, ამის გამეორება ძალიან ხშირად გვიწევს. ეს არ ნიშნავს იმას, რომ ჩვენ არ ვართ მზად კონსესუსისთვის, ზეპარტიულ საკითხებზე პოზიციების თანხვედრა გვქონდეს.
ამ ფორმატს რაც შეეხება, ძალიან მარტივად – ბუნდოვანია ფორმატის და პლატფორმის მიზანი! ჩემი აზრით, ეს არის სპეციალურად გაკეთებული იმისთვის, რომ სივრცეა სხვადასხვა მიმართულებით განვითარებისთვის დატოვებული, როგორც პოლიტიკური, ასევე სხვა. ეს, რა თქმა უნდა, იმ კონტექსტში, როდესაც დარწმუნებული ვიყავით, რომ ამ პლატფორმაში წარმოდგენილი იქნებიან ადამიანები, რომლებიც თავის დროზე კანდიდატის სტატუსთან მიმართებით, აბსოლუტურად ჩვენთვის მიუღებელ პოზიციას აფიქსირებდნენ მოლაპარაკების დროს ჩვენს სტრატეგიულ პარტნიორებთან, სხვადასხვა თვალსაზრისით, ზოგი ამბობდა, რომ ,,ჯერ ადრეა, ქვეყანამ კანდიდატის სტატუსი არ უნდა მიიღოს იმიტომ, რომ ეს არჩევნებისთვის ,,ქართულ ოცნებას“ გააძლიერებს“, ან ,,კანდიდატის სტატუსს ვერ იმსახურებს ქვეყანა, სადაც ყოფილი პრეზიდენტი პატიმრობაშია“ და ა.შ.
მოკლედ, ყველა იყენებდა სტატუსის მიღება/არმიღების საკითხს კონკრეტული პოლიტიკური პარტიული ინტერესების განსახორციელებლად, რაც ჩემთვის კატეგორიულად მიუღებელია“, – განაცხადა გიორგი გახარიამ.
