,,სტრატეგია აღმაშენებლის” ახალგაზრდული ორგანიზაციის ერთ-ერთი ლიდერი, ამირან ნატრიაშვილი, სააგენტო ,,პარალელთან” კომენტარში საუბრობს საქართველოს გეოფრაფიული და გეოპოლიტიკური პოტენციალის შესახებ:
,,ყველასთვის ცნობილია, რომ საქართველოზე გადის ევროპასა და აზიას შორის დამაკავშირებელი ერთ-ერთი სატრანსპორტო მარშრუტი – შუა დერეფანი. მიჩნეულია, რომ ჩვენი ქვეყანა ოდითგანვე იყო „აბრეშუმის გზის“ ნაწილი და ამის შესახებ, ჯერ კიდევ მე-13 საუკნეში, მარკო პოლოც კი საუბრობდა, რომელმაც პირველად გაიარა ,,აბრეშუმის გზა”, სრულად.
დღევანდელი გეოპოლიტიკური მდგომარეობის ფონზე გასათვალისწინებელია ის ფაქტიც, რომ უკრაინაში ომის დაწყების შემდეგ ,,ჩრდილოეთ დერეფანი”, რომელიც რუსეთის ფედერაციას კვეთდა, დაწესებული სანქციების შედეგად ფაქტიურად გაუქმდა. აღნიშნულმა გარემოებამ კიდევ უფრო შეუწყო ხელი საქართველოს გამოეყენებინა გეოგრაფიული პოტენციალი და უმნიშვნელოვანესი როლი შეეძინა აღნიშნულ სატრანსპორტო დერეფანში, სამწუხარეოდ ,,ქართული ოცნების” ხელისუფლება დღემდე არ მუშაობს ამ საკითხზე! საკითხზე, რომელსაც შეუძლია საქართველოს ეკონომიკა გაზარდოს ხუთჯერ!
მეტიც, ,,ქართულმა ოცნებამ” შეააჩერა თბილისის შემოვლითი რკინიგზის პროექტი და არ დაუშვა ანაკლიაში ღრმაწყლოვანი პორტის აშენება, რაც დღეს ჩვენს ქვეყანას ძალიან ძვირად უჯდება! აზიის და ევროპის მოწინავე ქვეყნები მზად არიან იმისთვის რომ ისარგებლონ საქართველოს დერეფნით, თუმცა არ ჩანს არცერთი ქმედითი ნაბიჯი ხელისუფლების მხრიდან. ამიტომ, ჩვენი ქვეყნისა და ხალხის ინტერესებიდან გამომდინარე, აუცილებელია ხელისუფლების ცვლილება, რათა ახალმა კოალიციურმა მთავრობამ უმოკლეს დროში განახორციელოს ეკონომიურად ძალზე მომგებიანი პროექტები’’, – განაცხადა ამირან ნატრიაშვილმა.
ავტორი
მარიამ ხაჩირაშვილი
