პრემიერ-მინისტრობის კანდიდატი, ირაკლი კობახიძე საპარლამენტო ოპოზიციის წინაშე სამთავრობო პროგრამით წარსდგა. ბექა ლილუაშვილი ჟურნალისტებთან გაკეთებულ განცხადებაში განმარტავს, თუ რატომ არ ესწრება ამ შეხვედრას პარტია “საქართველოსთვის” საპარლამენტო პოლიტიკური ჯგუფი:
,,პარტია ,,საქართველოსთვის’’ საპარლამენტო ჯგუფი დღევანდელ პლენარულ სხდომას, რომელსაც ,,ნაცები’’ უხელმძღვანელებენ, არ დაესწრება და მონაწილეობას არ მიიღებს, კობახიძის და ,,ნაც. მოძრაობის’’ გათამაშებულ ურთიერსასარგებლო სპექტაკლში.
ჩვენ ამ ორი რადიკალური ძალის მიერ, რადიკალიზაციის კიდევ უფრო გაღვივებაში წვლილს არ შევიტანთ.
თქვენ მოგეხსენებათ, ,,ოცნებამ’’, ,,ნაც. მოძრაობას’’ და საკუთარ თავს მისცა საჩუქარი იმით, რომ აკრძალა პოლიტიკური ჯგუფების და ფრაქციების ცალ-ცალკე შეხვედრების შესაძლებლობა მთავრობის წევრობის კანდიდატებთან.
ამის მთავარ მიზანს სწორედ ,,ნაციონალური მოძრაობის’’ თავმჯდომარეობით ამ დღევანდელი სხდომის ჩატარება წარმოადგენდა. ასე წარმართული სხდომა არის საჩუქარი კობახიძისთვისაც და ,,ნაცებისთვისაც’’ და ისინი ერთად ეცდებიან ეს სხდომა არა ხალხის პრობლემებზე საუბრისთვის გამოიყენონ, არამედ საზოგადოებაში რადიკალიზაციის ხარისხი კიდევ უფრო გააღვივონ.
ამასთან, საერთო სურათში ,,ნაც. მოძრაობის’’ ,,ეგიდით’’ წარმართული სხდომის, ოპოზიციის შეხვედრად გასაღება ორ რამეს ნიშნავს: ყველა მონაწილის გასვლას ამ რადიკალური დღის წესრიგის შექმნაში და ,,ნაც. მოძრაობის’’ იმ სარეკლამო კამპანიის გაგრძელებას, რომლის ფარგლებშიც ,,ოცნება’’ სააკაშვილის სასამართლო დარბაზებიდან, საარჩევნო კამპანიის წარმოებისა და დაქუცმაცებული პარტიის შეწებების შესაძლებლობას აძლევს. ჩვენი ადგილი ასეთ სხდომაზე არ არის.
ხვალინდელ გაერთიანებულ, ერთიან სხდომაზე, ჩვენი მოქალაქეების დაკვეთით, ვაჩვენებთ საზოგადოებას, რომ მთავრობის მომავალი შემადგენლობა არის მომსახურე პერსონალი არა ხალხის, არამედ ივანიშვილის, რომელსაც არც ერთ შინაარსობრივ კითხვაზე პასუხი არ აქვს და შესაბამისად ხალხის ნდობას არ იმსახურებს’’, – განაცხადა ბექა ლილუაშვილმა.
ავტორები:
ალექსანდრე ლეჟავა
მარიამ ხაჩირაშვილი
