თავდაცვის ყოფილი მინისტრი, ჯუანშერ ბურჭულაძე ჟურნალისტებთან კომენტარს აკეთებს თანამდებობის დატოვებისა და მმართველის პარტიის მხრიდან ახალი სამსახურის შეთავაზებასთან დაკავშირებით:
,,ბუნებრივია, პრემიერი შეიცვალა და ჩვენ გვქონდა კონსულტაციები. მე დიდად მადლობელი ვარ ბატონი ირაკლი კობახიძის, ახალი პრემიერის. მან მთელს გუნდს შემოგვთავაზა თანამდებობებზე დარჩენა, მაგრამ მე, ზოგადად, რომ იცოდეს საზოგადოებამ – მას შემდეგ, რაც კოდექსი მივიღეთ, ეს იყო ძირითადი სამართლებრივი აქტი, რაც უწყებაში ოდესმე მიღებულა, მე მქონდა თხოვნა ბატონ პრემიერთან, ირაკლი ღარიბაშვილთან წასვლასთან დაკავშირებით. მან მთხოვა, რომ ჯერ არ მიმეღო ეს გადაწყვეტილება. ახლა, ბუნებრივია, მე პრინციპულად ვერ შევძლებდი ამ თანამდებობაზე გაჩერებას.
[ჟურნალისტების ჩაკითხვა]: – რატომ, რატომ? რომ აგვიხსნათ.
პირველ რიგში, 13 წელია ვარ საჯარო მოხელე, ეს არის ძალიან ბევრი, 3 როტაცია ჩავატარე, 4.5 წელი ვიმუშავე 3 უწყებაში – ეს ერთი.
მეორე, – დიდი ოჯახი მყავს, ეს იცით თქვენც და მე მივიღე შემოთავაზება, რისთვისაც მადლობას ვუხდი ახალ პრემიერ-მინისტრს, რომ განვიხილო NATO-ში ჩვენი ელჩობის თანამდებობა. ეს იქნება 4 თვის მერე. მე, სავარუდოდ, დავთანხმდები ამ თანამდებობას, თუმცა, მე მაქვს ფიქრის დრო. ეს 4 თვე იქნება ჩემთვის თან დასვენების დრო, ამ 13 წლიანი საჯარო მოხელეობის პერიოდიდან, ასევე, მივიღებ გადაწყვეტილებას გავაგრძელებ თუ არა დიპლომატიურ სამსახურს.
მე მინდა, კიდევ ერთხელ, დიდი მადლობა გადავუხადო ყოფილ პრემიერს, ბატონ ირაკლი ღარიბაშვილს, რომ მომცა საშუალება, ერთი მხრივ, მემუშავა მასთან ერთად, რაც იყო ძალიან წარმატებული პერიოდი და მეორე მხრივ, მე მომეცა საშუალება უკეთ გამეცნო ჩვენი ჯარი. მე ძალიან ამაყი ვარ და მინდა მადლობა გადავუხადო თითოეულ ჯარისკაცსა და სამინისტროს თანამშრომელს. ეს 5 წელი იქნება საამაყო ჩემს ცხოვრებაში“, – აცხადებს ჯუანშერ ბურჭულაძე.
ინფორმაციისთვის: ,,ქართული ოცნების” ყრილობის შემდეგ, თავდაცვის მინისტრმა ჯუანშერ ბურჭულაძემ თანამდებობა დატოვა.
ავტორი
ალექსანდრე ლეჟავა
