სამების საკათედრო ტაძარში დაბრძანებული სტალინის გამოსახულებიანი ხატის ირგვლევ განვითარებულ მოვლენებსა თუ ვნებათაღელვას მწვავე და ამავდროულად ირონიანარევი შეფასებებით ეხმაურება “ეთნიკურ და კონფესიურ ურთიერთობათა ცენტრის” ხელმძღვანელი, ლელა ჯეჯელავა:
“მთავარი, რაც გასული დღეების “ქარტეხილებმა” გვაჩვენა მკაფიოდ: აღმოჩნდა, რომ ის ჯგუფები, ვინც ეკლესიის მტრებს გვიწოდებდნენ ადამიანებს, რომლებიც საპატრიარქოს ვაკრიტიკებდით ერთადერთი მიზნით, რომ ეკლესია აგვერიდებინა თვითლიკვიდაციის ძალიან საშიში გზისგან, რომელსაც ის დაადგა მყარად, თურმე ეკლესიას ფარად იყენებდნენ მხოლოდ პოლიტიკურ მზისქვეშეთში თავის დასამკვიდრებლად.
საპატრიარქო კი მათ იყენებდა ჩვენს წინააღმდეგ და თან მათი ბრძოლის ყველაზე ბრუტალურ მეთოდებსაც არა მარტო აკურთხებდა, არამედ თანამონაწილეობდა კიდეც.
როგორც კი საპატრიარქოსა და “მე მიყვარს ჩემი პატრიარქი” ტიპების ინტერესები ერთმანეთს დაუპირისპირდა, უცებ გამოჩნდა ამ “ქრისტესმიერი სიყვარულის” ჭეშმარიტი სახე.
ისეთი კომენტარები წავიკითხე ამ ჩვენის ძალად “ეკლესიურების”, რომ ყველაზე თავზეხელაღებული ულტრა ლიბერალი გონებაშიც არ გაივლებდა და წაკითხვისას გულწრფელად გაწითლდებოდა😊
ახლა ამათ შერიგებას რუსეთიდან ზარიც არ ეყოფა. მინიმუმ პოლკოვნიკის ჩინის და ეპისკოპოსის ხარისხის მიტროსანის ჩამოსვლაა საჭირო “სიყვარულის კოცონის” თავიდან ასაგიზგიზებლად😊“, – წერს ფეისბუქის პირად გვერდზე ლელა ჯეჯელავა.