,,ლეიბორისტული” პარტიის თავმჯდომარე, შალვა ნათელაშვილი საგანგებო ბრიფინგზე განცხადებას აკეთებს, სადაც აღნიშნავს, რომ მზადდება წინადადება პარტია ,,ქართული ოცნების” დამფუძნებლისა და საპატიო თავმჯდომარის, ბიძინა ივანიშვილის სანქცირების საკითხთან დაკავშირებით:
,,საქართველოს ,,ლეიბორისტული” პარტიის მიერ ათეული წლის წინ დაწყებულმა ბრძოლამ ოლიგარქის დასანქცირებაზე, მთელი მსოფლიოს მასშტაბით, ეს პიროვნება შეიყვანა ფაქტობრივი სანქციების რეჟიმში. თუ ვინმეს ეს არ ეჯერა, რამდენიმე დღის წინ, ალბათ, ყველამ მოისმინეთ, როგორ აღიარა ივანიშვილმა, რომ ის დასანქცირებულია, მაგრამ ეს ჯერ კიდევ არ ნიშნავს გაზაფხულს.
იმისათვის, რომ ჩვენი სამშობლო გამოეხსნას პუტინისტური გველეშაპის კლანჭებს, საჭიროა ამ პროცესის დაგვირგვინება და საქართველოს ,,ლეიბორისტული” პარტია ამზადებს სანქციათა ახალ პაკეტზე წინადადებებს, რომლებიც ამ დღეებში გაიგზავნება ვაშინგტონსა და ბრიუსელში და რაც მოიცავს შემდეგ პუნქტებს:
-
დასანქცირდეს ივანიშვილის საბანკო ანგარიშები მსოფლიოს ყველა ბანკსა და საფინანსო ორგანიზაციაში;
-
დაიბლოკოს ივანიშვილის მიერ გახსნილი კორპორაციები ოფშორულ ზონაში;
-
დაყადაღდეს ივანიშვილის აქციები მსოფლიოს ტრანსნაციონალურ კორპორაციებში;
-
ჩამოერთვას და დაიბლოკოს ივანიშვილის უძრავ-მოძრავი ქონება დედამიწის ყველა წერტილში;
-
დაედოს სავიზო დიპლომატიური სანქციები ოლიგარქ ივანიშვილსა და მისი ოჯახის ყველა წევრს.
ეს უნდა გაკეთდეს დროზე, სანამ ოლიგარქი მთელ მსოფლიოს და პირველ რიგში, საქართველოს მოევლინება პრეზიდენტად ან პრემიერად, რითაც დამატებითი პრობლემები შეიქმნება მისი საბოლოო ნეიტრალიზაციის გზაზე“, – განაცხადა შალვა ნათელაშვილმა.
ავტორი
ნინი ხიჯაკაძე
