“ძალიან დიდი იმედი მაქვს, რომ ეყოფა გამბედაობა და აღარ დაიმალება” – გიორგი გახარია ბიძინა ივანიშვილზე

ყოფილი პრემიერ-მინისტრი, პარტია ,,საქართველოსთვის” თავმჯდომარე, გიორგი გახარია განცხადებას აკეთებს მასსა და ,,ქართული ოცნების” საპატიო თავმჯდომარის, ბიძინა ივანიშვილს შორის არსებულ პოლიტიკურ დამოკიდებულებაზე:

,,რაც შეგვეხება ჩვენ, ზუსტად მინდა იცოდეთ, რომ ჩემი გადადგომის პირველივე დღიდან ივანიშვილმა ზუსტად იცოდა, რომ ჩვენ ვერავინ და ვერაფერი ვერ გაგვაჩერებდა. ზუსტად იცოდა იმიტომ, რომ ყველაზე კარგად და დეტალურად იცოდა ამ გადადგომისა და ნაბიჯის მიზეზები. შესაბამისად, ეს 3 წელია ასე იწყევლება – ჯერ წერილებიდან, შემდეგ ამ “პატარა ბიჭების”, “მშიშარა ბიჭების” საშუალებით. მე მგონი, ივანიშვილი ფიქრობს, რომ მის წყევლას მაგიური ძალა აქვს. სამწუხაროდ, მის წყევლას მაგიური ძალა კი არა, იმდენჯერ მოატყუა ხალხი და გუნდიც, რომ მის სიტყვასაც უკვე არანაირი ძალა არ აქვს.

მინდა იცოდეთ, რომ მე მარტივი მიდგომა მაქვს. მსგავსი ბრალდებების შემდგომ ყველა პასუხისმგებლიანი ადამიანი ვალდებულია გადადგას კონკრეტული ნაბიჯები. მე ამ ნაბიჯებს ველოდები.

უფრო მეტიც, ჩემი მხრიდან, თუ მისი სურვილი იქნება, ნებისმიერ ფორმატში: სამართლევრივად? – მისსავე სასამართლოში; პოლიტიკურად? – მისსავე მედია საშუალებების პლატფორმაზე; ქართულად? – ნებისმიერ ფორმატში, ნებისმიერი დამსწრების პირობებში. იმიტომ, რომ ზუსტად ვიცი, სამართლებრივადაც, პოლიტიკურადაც, 100%-იანი მართალი ვარ და რაც მთავარია, ადამიანურად ვარ მართალი. ეს თვითონაც ძალიან კარგად იცის.

მე ძალიან დიდი იმედი მაქვს, რომ ეყოფა გამბედაობა და აღარ დაიმალება. ეს იქნება პასუხისმგებლიანი პოლიტიკოსის ნაბიჯი. ეს იქნება ჩვენი მოქალაქეების პატივისცემა“, – განაცხადა გიორგი გახარიამ.

ავტორი
ნინი ხიჯაკაძე