2024 წლის 1 იანვრიდან 2013 წლამდე წარმოებული ავტომობილების იმპორტის აკრძალვა ძალაში შევიდა. აღნიშნული გადაწყვეტილება მთავრობამ 2023 წლის ივნისში მიიღო.
თემასთან დაკავშირებით, როგორი მოლოდინები შეიძლება შეიქმნას ბაზარზე, სააგენტო ,,პარალელთან” ინტერვიუში ისაუბრა ,,საქართველოს ავტო იმპორტთა ასოციაციის” თავმჯდომარემ, ლაშა დარბაისელი:
“2013 წლამდე წარმოებული ავტომობილების აკრძალვის შესახებ კანონი სინამდვილეში არ განაახლებს საქართველოს ავტოპარკს. აღნიშნული ცვლილება სხვა გზებით უნდა განხორციელდეს. ადამიანს იმის საშუალება უნდა მიეცეს, რომ ავტომობილის განბაჟებაში ნაკლები თანხა გადაიხადოს, რათა ძველი ავტომობილი ახლით ჩაანაცვლოს. ასე პირდაპირ აკრძალვა და 10 წელზე ასაკოვანი ავტომობილების ქვეყანაში ვეღარ შემოყვანა, არ არის სწორი მიდგომა და მძიმე მდგომარეობას უფრო მეტად დაამძიმებს.
თუ ვინმე ფიქრობს, რომ ქართველი საკუთარ მანქანას გააჩერებს და სხვა ტრანსპორტით იმგზავრებს, ძალიან ცდება. სახელმწიფომ ალტერნატიული ვარიანტი უნდა მოიფიქროს პრობლემის ძირეულად აღმოსაფხვრელად. დღეს ახალი ავტომობილი თუ ხელმიუწვდომელია ჩვენი მოქალაქისთვის, შესაბამისად, იმ ძველს ვეღარც გაყიდის, იმ თანხასაც ვერ დაამატებს. ამაშია პრობლემა, რომ უფრო მეტად დაძველდება ავტოპარკი, არა თუ განახლდება. ეს ეკოლოგიაზე პირდაპირ უარყოფითად აისახება.
დაველოდოთ მიმდინარე მოვლენებს, იმედია, რაიმე უკეთესობისკენ შეიცვლება“, – განაცხადა ლაშა დარბაისელმა
შეგახსენებთ, რომ 2024 წლის 1-ლი იანვრიდან საქართველოში 2013 წლამდე გამოშვებული მსუბუქი ავტომობილების იმპორტი აიკრძალა. გამონაკლისი დაიშვა ამ ასაკის მხოლოდ იმ ავტომობილებზე, რომლებიც 2023 წლის 1-ელ დეკემბრამდე ჩაიტვირთა კონტეინერზე, თუმცა, 1-ელ იანვრამდე ქვეყანაში ჩამოსვლა ვერ მოასწრო.
ავტორი
ნინი ხიჯაკაძე
