ჩვენთვის უმთავრესი პრიორიტეტი გახლავთ, რომ მოსახლეობის უსაფრთხოებას არ შეექმნას არანაირი რისკები – ქეთევან ციხელაშვილი

46

შერიგებისა და სამოქალაქო თანასწორობის საკითხებში საქართველოს სახელმწიფო მინისტრი სოხუმში მიმდინარე მოვლენებს გამოეხმაურა.

ქეთევან ციხელაშვილის განცხადებით, ოფიციალური თბილისისთვის ყველაზე მნიშვნელოვანია, რომ ადგილობრივი მოსახლეობის უსაფრთხოება იყოს დაცული.

“ჩვენთვის, რა თქმა უნდა, უმთავრესი პრიორიტეტი გახლავთ, რომ ნებისმიერი განვითარება იყოს მშვიდობიანი და მოსახლეობის უსაფრთხოებას არ შეექმნას არანაირი რისკები.

ამ ეტაპზე და, ზოგადად, რა თქმა უნდა, ყველა მოვლენა წარმოადგენს ჩვენი ინტერესის სფეროს.

კიდევ ერთხელ, ჩვენთვის ყველაზე მნიშვნელოვანია ადამიანის უფლებები და ის, რომ მათი უსაფრთხოება იყოს დაცული. ამიტომ, იმედს გამოვთქვამ, რომ ნებისმიერი განვითარება იქნება მხოლოდ მშვიდობიანი“, – განაცხადა სახელმწიფო მინისტრმა.

ინფორმაციისთვის: 

სოხუმში 9 იანვარს, ოპოზიციური პარტიების – “ამცახარა”-სა და “ერთიანი აფხაზეთის” მიერ რაულ ხაჯიმბას გადადგომის მოთხოვნით დაწყებული საპროტესტო აქცია, საოკუპაციო რეჟიმის დე ფაქტო პრეზიდენტის ადმინისტრაციის შენობის შტურმით და შენობის დაკავებით დასრულდა. თუმცა პროცესი ამით არ დასრულებულა და მომიტინგეები ე.წ. პარლამენტისგან ხაჯიმბას გადადგომას ითხოვდნენ.

როგორც ცნობილია. ა.წ. 8 სექტემბერს ჩატარებული ე.წ. საპრეზიდენტო არჩევნების შედეგებს სადავოდ მიიჩნევდა ოპოზიცია. ოკუპირებულ ტერიტორიაზე ჩატარებული ე.წ. საპრეზიდენტო არჩევნებში კი ერთმანეთს უპირისპირდებოდნენ რაულ ხაჯიმბა და ალხას კვიცინია.

კომენტარები