„საქართველოში ევროკავშირის მოახლოებასთან ერთად, სრულად იცვლება საზოგადოების განწყობა ცხინვალსა და სოხუმში, ხალხის ნებას ვერავინ დაუპირისპირდება“, – ასე ეხმაურება „სტრატეგია აღმაშენებლის“ თავმჯდომარე, გიორგი ვაშაძე სამხრეთ ოსეთის ე.წ. პრეზიდენტის მიერ გაკეთებულ განცხადებას, რომ რუსეთთან მიერთების საკითხი კვლავ აქტუალურია.
ოპოზიციონერი ლიდერის თქმით, საზოგადოებრივი განწყობები ოკუპირებულ ტერიტორიებზე იცვლება, რაც მარიონეტული რეჟიმების გააქტიურებას იწვევს:
“საქართველოში ევროკავშირის მოახლოებასთან ერთად, სრულად იცვლება საზოგადოების განწყობა ცხინვალსა და სოხუმში.
ძალიან კონკრეტული არჩევანი აქვს ხალხს: რუსული პასპორტი, რომელიც სიკვდილთან ასოცირდება თუ ქართულ-ევროპული პასპორტი, რომელიც პერსპექტივასთან და განვითარებასთან ასოცირდება.
ჩემთანაც გამოდის ბევრი კონტაქტზე და ზუსტად ვიცი, რომ მთლიანად იცვლება ვითარება ოკუპირებულ ტერიტორიებზე, ამიტომაც კეთდება ეს განცხადებები, ამიტომაც გააქტიურდნენ ასე საოკუპაციო რეჟიმები. ჩვენთვის მთავარი ამოცანაა, რომ სწრაფად შევდივართ ევროკავშირში, რაც არის გზა საქართველოს ტერიტორიული მთლიანობის აღდგენისკენ, ხალხის ნებას ვერავინ ვერ დაუპირისპირდება, რაც არ უნდა ეცადონ ოკუპირებული ტერიტორიების მარიონეტული რეჟიმები“, – განაცხადა გიორგი ვაშაძემ.
ინფორმაციას ავრცელებს პოლიტიკური პარტია “გიორგი ვაშაძე – სტრატეგია აღმაშენებლის” და საპარლამენტო ფრაქცია “რეფორმების ჯგუფის” მედიასთან და საზოგადოებასთან ურთიერთობის სამსახური
