„ღარიბაშვილი არის ზიზღის, დაპირისპირებისა და ფულის კეთების სიმბოლო – ეს არის რეალურად ღარიბაშვილი და მთლიანად „ქართული ოცნების“ სახე, ყველა მისი განცხადება არის სამწუხარო ბელეტრისტიკა“, – ასე გამოეხმაურა „სტრატეგია აღმაშენებლის“ თავმჯდომარე, გიორგი ვაშაძე საქართველოს პრემიერ – მინისტრის, ირაკლი ღარიბაშვილის მიერ წლიური ანგარიშის წარდგენას.
როგორც ოპოზიციონერი ლიდერი აღნიშნავს, ღარიბაშვილს დემოგრაფიული, ეკონომიკური და სხვა არაერთი მძიმე მაჩვენებლის გამო ქართველი ხალხისთვის ბოდიში აქვს მოსახდელი.
მისივე თქმით, 2024 წლის არჩევნები არის უმნიშვნელოვანესი, რათა დაპირისპირება და ზიზღი საქართველოში სამუდამოდ დასრულდეს:
“ძალიან სამწუხაროა და ევროკავშირის კანდიდატის სტატუსი არ შველის ამ ადამიანებს. მე ვფიქრობდი, რომ ღარიბაშვილი საქართველოს მოწიწებით ბოდიშს მოუხდიდა, რადგან შობადობის კუთხით გვაქვს კატასტროფული მდგომარეობა; ასევე, მე ვფიქრობდი, რომ ბოდიშს მოუხდიდა საქართველოს, რადგან ემიგრაციის კუთხით გვაქვს კატასტროფული მდგომარეობა; ბოდიშს მოუხდიდა ბევრ უმუშევარ ადამიანს, რომ ვერ შეძლო მათი დახმარება და ბოდიშს მოიხდიდა საკუთარი განცხადებების გამო, რაც ევროკავშირთან მიმართებით, კანდიდატის სტატუსის მიღებამდე გააკეთა.
ეს არის პიროვნება, რომელიც იქცა კორუფციის სიმბოლოდ და გვაშორებს ევროკავშირს და არ გვაახლოვებს. დანარჩენი ყველა მისი ნათქვამი არის სამწუხარო ბელეტრისტიკა. მისი თაოსნობით ხელისუფლებაში გვყავს პოლიტიკური ძალა, რომელიც ყოფს, ხლეჩს, აპირისპირებს და არ აერთიანებს.
ევროკავშირის სრულუფლებიანი წევრობა თუ გვინდა, მაშინ ეროვნული იდეის გარშემო გაერთიანებული ადამიანები გვჭირდება და არა ძალა, რომელიც უპირისპირდება ხალხს.
ღარიბაშვილი არის ზიზღის, დაპირისპირებისა და ფულის კეთების სიმბოლო – ეს არის რეალურად ღარიბაშვილი და მთლიანად „ქართული ოცნების“ სახე. ამიტომ გვჭირდება არჩევნებში გამარჯვება, რომ სწრაფად გავხდეთ ევროკავშირის წევრი, რომ არ იყოს ამ ქვეყანაში დაპირისპირება და ზიზღი, არამედ იყოს საქმის კეთება, ხალხის გაჭირვებაზე ზრუნვა, დემოგრაფიული და ემიგრაციული პრობლემების მოგვარება, რომელზეც უნდა ზრუნავდეს პრემიერი და არ უნდა ვისმენდეთ მის აბსურდულ განცხადებებს“, – განაცხადა გიორგი ვაშაძემ.
ინფორმაციას პოლიტიკური პარტია “გიორგი ვაშაძე – სტრატეგია აღმაშენებლის” და საპარლამენტო ფრაქცია “რეფორმების ჯგუფის” მედიასთან და საზოგადოებასთან ურთიერთობის სამსახური ავრცელებს
