„დღეს, საჯარო სკოლას შველა სჭირდება! ვიდრე განათლების სისტემა ემსახურება მმართველი პარტიის საარჩევნო ინტერესებს და არა მოსწავლეთა შედეგების გაუმჯობესებას, წარმატებული მომავლის იმედი ვერ გვექნება“, – ამის შესახებ „სტრატეგია აღმაშენებლის“ განათლების მიმართულების ხელმძღვანელმა, ნანა ტოხვაძემ განაცხადა.
როგორც ტოხვაძე აღნიშნავს, განათლების სისტემაში უსამართლობა და პოლიტიკური რეპრესიები უნდა დასრულდეს და კვალიფიციური დირექტორობის კანდიდატები სისტემის მსხვერპლნი არ უნდა გახდნენ.
მისივე თქმით, მასწავლებლების პროტესტის უკან ასობით დაბლოკილი კადრი და დაშინებული პედაგოგი დგას:
„დღეს, საჯარო სკოლას შველა სჭირდება! ვიდრე განათლების სისტემა ემსახურება მმართველი პარტიის საარჩევნო ინტერესებს და არა მოსწავლეთა შედეგების გაუმჯობესებას, წარმატებული მომავლის იმედი ვერ გვექნება. ჯერ კიდევ 2020 წლიდან „სტრატეგია აღმაშენებლის“ დაყენებული ინიციატივები განათლებაში დღეს კიდევ უფრო აქტუალურია.
3 მთავარი ნაბიჯი – განათლების დეპოლიტიზება, დეცენტრალიზება და პროგრამების მოდერნიზება სასწრაფოდ გადასადგმელია, თუ კრიზისიდან გამოსვლა ჩვენი ეროვნული მისწრაფებაა.
ცხადია, სავალდებულოა, სისტემა რეფორმირდეს იმგვარად, რომ უსამართლობის, პოლიტიკური მიკერძოებისა და რეპრესიების მსხვერპლი არ გახდნენ კვალიფიციური დირექტორობის კანდიდატები. დიახ, ამ პროტესტის მიზანიც სწორედ ისაა, რომ გამოფხიზლდნენ განათლების ხარისხით უკმაყოფილო მშობლები და სისტემისგან ჩაგრული მასწავლებლები, ხმა აიმაღლონ უსამართლობაზე, რომელიც ღუპავს თაობებს და განათლების დონეს აუარესებს.
დიახ, უნდა შევქმნათ სისტემა, რომელიც დემოკრატიულ, თავისუფალ, კონკურენტულ და სამართლიან გარემოს უზრუნველყოფს, სადაც განათლების ხარისხი და სკოლის ბედი არც ცუდ და კარგ მინისტრზე, არც მმართველი პარტიის კეთილგანწყობასა და პოლიტიკურ სიმპათიებზე იქნება დამოკიდებული, არამედ ცენტრში მოექცევა მოსწავლის საუკეთესო ინტერესი, მასწავლებლის თავისუფლება და სამართლიანად შერჩეული კომპეტენტური საგანმანათლებლო ლიდერების არჩევა სკოლის ხელმძღვანელად.
„ორი ადამიანის პროტესტის“ (როგორც განათლების მინისტრი უწოდებს) უკან დგას სისტემისგან დაჩაგრული, სკოლიდან გაგდებით დაშინებული, რეპრესირებული მასწავლებლები, 500-მდე „დაბლოკილი – დირექტორობის მსურველი“, 37-ზე მეტი სასამართლოში მომჩივანი კანდიდატი და რაც მთავარია, საზოგადოება, რომელიც საერთოეროვნული პრობლემების ათეულში ასახელებს განათლების დაბალ დონეს“, – განაცხადა ნანა ტოხვაძემ.
ინფორმაციას პოლიტიკური პარტია “გიორგი ვაშაძე – სტრატეგია აღმაშენებლის” და საპარლამენტო ფრაქცია “რეფორმების ჯგუფის” მედიასთან და საზოგადოებასთან ურთიერთობის სამსახური ავრცელებს
