დედის, პედაგოგ ია კერზაიას გარდაცვალების 5 წლისთავს ემოციური პოსტით იხსენებს იურისტი, სამოქალაქო აქტივისტი ბაჩანა შენგელია:
“ეს ჩვენი ერთ-ერთი ბოლო საერთო ფოტოა ❤️❤️
ვერ ვიტან 2 დეკემბერს, ხუთი წლის წინ ამ დღეს გავიგე იას ხმა ბოლოჯერ. შემდეგ კი იყო ჯოჯოხეთური ერთი კვირა, უიმედო იმედის დღეები… იყო ექიმი, რომელიც თვალს არ მისწორებდა და მე კი მის ნათქვამს გონებაში არ ვუშვებდი, წარმოდგენაც არ შემეძლო იას გარეშე როგორ უნდა მეცხოვრა, რადგან მანამდე ასეთი წუთიც არ მქონია ცხოვრებაში.
ყოველდღე ვცდილობდი ხმა მიმეწვდინა, არ ვიცი, შეიძლება მივაწვდინე კიდევაც, იმედია გადავეცი ის სიყვარული, რასაც მის მიმართ ვგრძნობდი. ყოველ შემდეგ ნახვაზე, მისი სუნთქვა უფრო სუსტი მეჩვენებოდა, უფრო სწორად, ვფიქრობდი რომ მეჩვენებოდა, მაგრამ თუნდაც ყველაზე სუსტი არ მინდოდა შეწყვეტილიყო. მაინც შეწყდა 9 დეკემბერს, მაგრამ მხოლოდ სუნთქვა, რადგან მის მიერ გაცემული სიყვარული, სითბო და ბედნიერება მგონი მთელ სამყაროს ეყოფა❤️❤️
გვათბობს ყველას, გვაცოცხლებს და სტიმულს გვაძლევს. ზუსტად ვიცით, რა უნდა ვაკეთოთ და როგორ. რაზე ოცნებობდა, როგორ ქვეყანას აშენებდა მომავალი თაობისთვის და რა იდეალებით იცხოვრა.
ბედნიერი ვარ, დე, შენი შვილი რომ მქვია, ბედნიერი იქნება ანდრია შენი შვილიშვილი და ყველა ის ადამიანი, ვის ცხოვრებაშიც შენ კვალი დატოვე. მიყვარხარ უზომოდ, გაცილებით მეტად ვიდრე მანამდე, სანამ ორი დეკემბერი ფიზიკურად დაგვაშორებდა. და საოცრად, საოცრად მენატრები❤️❤️“, – წერს ფეისბუქის პირად გვერდზე ბაჩანა შენგელია.
