„სტრატეგია აღმაშენებლის“ თავმჯდომარე, გიორგი ვაშაძე და საგარეო მდივანი, სერგო ჩიხლაძე აშშ-ს ახლადდანიშნულ ელჩთან შეხვედრას მართავენ.
შეხვედრაზე, რომელიც აშშ-ს ელჩის, რობინ დანიგანის ინიციატივით იმართება, სავიზო რეჟიმისა და თავისუფალი ვაჭრობის საკითხები, ასევე 2024 წლის არჩევნებისთვის სადამკვირვებლო მისიების მნიშვნელობა განიხილება.
ვაშაძის თქმით, აშშ საქართველოს პირველი სტრატეგიული პარტნიორია, რომელსაც საქართველოს ევროინტეგრაციის პროცესში მნიშვნელოვანი წვლილის შეტანა შეუძლია:
„აშშ არის საქართველოს N1 სტრატეგიული პარტნიორი, „ქართული ოცნების“ რუსული პროპაგანდის მიუხედავად, საზოგადოების პოზიცია არის ძალიან მყარი და ჩვენ გვჭირდება ამერიკელი მეგობრების დახმარება რამდენიმე საკითხში:
- პირველი – გავხდეთ ევროკავშირის სრულუფლებიანი წევრი და ჩვენ ძალიან კარგად გვესმის, რომ ამერიკას აქვს ძალიან მნიშვნელოვანი ხმა ამ საკითხში;
- მეორე – გავთავისუფლდეთ ოლიგარქიული რეჟიმისგან;
- მესამე – საქართველოში ავაშენოთ დემოკრატიული, ძლიერი სახელმწიფო, სადაც ყველა მოქალაქის ინტერესი იქნება დაცული.
ამისთვის მნიშვნელოვანია, მეტ-ნაკლებად ნორმალურ გარემოში მაინც ჩატარდეს არჩევნებში, საჭიროა – გრძელვადიანი სადამკვირვებლო ჯგუფები აშშ-დან და ევროკავშირიდან, რათა „ქართულ ოცნებას“ მასობრივი, ტოტალური გაყალბების შესაძლებლობა არ მიეცეს.
აშშ-ს ელჩთან შეხვედრაზე ვისაუბრებთ იმ მნიშვნელოვან საკითხებზე, რომლებიც საზოგადოებას აწუხებს – ეს არის სავიზო რეჟიმისა და თავისუფალი ვაჭრობის საკითხები, შავი ზღვის მხარდამჭერი აქტი, და რაც მთავარია, გრძელვადიანი სადამკვირვებლო ჯგუფები 2024 წლის არჩევნებისთვის“, – განაცხადა გიორგი ვაშაძემ.
ინფორმაციას პოლიტიკური პარტია “გიორგი ვაშაძე – სტრატეგია აღმაშენებლის” და საპარლამენტო ფრაქცია “რეფორმების ჯგუფის” მედიასთან და საზოგადოებასთან ურთიერთობის სამსახური ავრცელებს
