კლინიკა “ვივამედიდან” მიხეილ სააკაშვილის მორიგი გზავნილი გამოვიდა, რაც მისი ფეისბუქის ოფიციალურ გვერდზე გავრცელდა და სადაც მე-3 პრეზიდენტის კონკრეტული შეფასება-განმარტებებია “ერთიან ნაციონალურ მოძრაობაში” მიმდინარე პროცესებზეც:
“ყველა, ვინც ცდილობს, რომ თავისი ვიწრო მიზნებისთვის “დავრდომილ” ადამიანად წარმომადგინოს, რომელიც ვერ აცნობიერებს ბოლომდე თუ რას აკეთებს, პუტინის თამაშს თამაშობს და ძალიან მწარედ ცდება.
ფიზიკურად, რა თქმა უნდა, მაქვს პრობლემები, მაგრამ სულიერად არასდროს ვყოფილვარ უფრო მტკიცედ, ვიდრე ახლა და სრულიად ნათლად ვხედავ ჩემი და “ერთიანი ნაციონალური მოძრაობის” ბრძოლის მიმართულებას და ძალიან ოპტიმისტურად ვუყურებ მის პერსპექტივებს. ასევე მაძლიერებს ის უდიდესი მხარდაჭერა, რომელსაც ვგრძნობ ქართველი ხალხისგან, რომლისთვისაც არასდროს მიღალატია და არც ვუღალატებ – არ მივატოვე და არც მივატოვებ ამ განსაცდელის ჟამს!
ერთიანობა და განახლება რჩება ჩვენი ბრძოლის მთავარ პრიორიტეტად.
პარტიაც უნდა მოემზადოს გადამწყვეტი ბრძოლებისთვის. მიხარია, რომ ბევრი ახალი ადამიანი გვიერთდება, ასევე მოქმედი ახალგაზრდა აქტივისტები ამ ბრძოლებში ძალიან გამოიბრძმედნენ და დაიხვეწნენ და მინდა იცოდეთ, რომ ჩემთვის დიდი პატივია თქვენთან ერთ პარტიაში ყოფნა“, – აცხადებს მიხეილ სააკაშვილი.
