სოციალურ ქსელში, ოკუპანტების ახალი საოკუპაციო გეგმის თაობაზე, სკანდალურ ინფორმაციას ავრცელებს ანტისაოკუპაციო მოძრაობა “ძალა ერთობაშიას” დამფუძნებელი, დავით ქაცარავა და ხელისუფლებას რეაგირებისკენ მოუწოდებს:
“ოკუპანტების ახალი საოკუპაციო გეგმა – ზემო რაჭა, ზემო იმერეთი, შიდა ქართლი, მცხეთა-მთიანეთი.
ახალი გეგმა მოიცავს ამ ოთხი რეგიონის იმ ტერიტორიებს, რომლებიც 2008 წლის ომის შედეგად არ დაგვიკარგავს, ანუ არ შედიოდა ცხინვალის რეგიონის ადმინისტრაციულ საზღვრებში.
ახალი საოკუპაციო გეგმის მიხედვით, საოკუპაციოდ მომზადებული ფართობი შეადგენს 208 000 000 კვ.მ.
დღეს გთავაზობთ ამ გეგმის ერთ-ერთ ნაწილს, კერძოდ კი ლომისას ტაძართან, აი იქ, კეთილგანწყობილი ოკუპანტები შოკოლადებით რომ მიდიან ხოლმე, ახალ ხაზს, რომელიც ქედის ძირში გაივლის და ჩავა ზემო მლეთაში, ყოველ შემთხვევაში, ოკუპანტების ახალი მონახაზი ასეთია.
მიმაგრებული ფაილი ამოღებულია სეპარატისტული რეჟიმის ე.წ. სადელიმიტაციო კომისიის პრეზენტაციიდან, რომლის სრული ვიდეო ჩანაწერი დევს ჩემს იუთუბ არხზე.
ვისაც გსურთ, დახარჯეთ 1 საათი და დატკბით ოკუპანტების ახალი საოკუპაციო გეგმებით.
ხელისუფლება ბოლომდე აიგნორებს ამ უდიდეს საფრთხეს და აგრძელებს რუსებთან მოღალატეობრივ კოლაბორაციას.
შემდეგ პოსტებში წარმოგიდგენთ საოკუპაციო რეჟიმის მიერ მომზადებულ, ახალი საოკუპაციო გეგმის ეტაპობრივ მიმოხილვას.
იქნებ ვინმემ მაინც გაიღვიძოს ამ ხელისუფლებიდან“, – წერს ფეისბუქის პირად გვერდზე დავით ქაცარავა.
ოკუპანტების ახალი საოკუპაციო გეგმა გასაჯაროვებული დავით ქაცარავას მიერ
