“გამარჯვების კოალიციის” წარმომადგენლებმა – ,,ერთიანი ნაციონალური მოძრაობის” სამოქალაქო ინტეგრაციის მდივანმა ედო ჯავახიძემ და ,,სტრატეგია აღმაშენებლის” ეთნიკურ-რელიგიური უმცირესობების მიმართულების ხელმძღვანელმა, შორენა ლობჟანიძემ ერთობლივი ბრიფინგი გამართეს ქართული ენის სწავლების მნიშვნელობასთან დაკავშირებით:
,,კოალიციის ფარგლებში შემუშავებულ იქნა პროგრამა, რომელიც უზრუნველყოფს საქართველოში სახელმწიფო ენის სწავლებას, რაც უმნიშვნელოვანესია ქვეყნის დემოკრატიული გავითარებისთვის.
საქართველოს ყველა მოქალაქე უნდა საუბრობდეს ქართულად, რომლის განხორციელებაც საჭიროა ქვეყნის დემოკრატიული განვითარებისთვის! საჭიროა ერთიანი ეროვნული ქსოვილის გასაძლიერებლად, ადამიანის უფლებების დაცვისთვის და ეკონომიკის განსავითარებლად!“ – განაცხადა ედო ჯავახიძემ.
აღნიშნულთან დაკავშირებით პოზიცია დააფიქსირა, ასევე, შორენა ლობჟანიძემ:
,,ჩვენი მიზანია:
- გავაორმაგოთ ქართული ენის მასწავლებელთა რაოდენობა;
- არაქართულენოვან მოსახლეობაში ქართული ენის მივლენილ მასწავლებლებს გავუზარდოთ შრომის ანაზღაურება;
- შევქმნათ ორენოვანი სწავლების თანამედროვე საჭიროებებზე მორგებული კონცეფცია;
- უზრუნველვყოთ ბაღების მშენებლობა არაქართულენოვან დასახლებებში, რათა სკოლამდელი ასაკის ბავშვებს ჰქონდეთ ქართული ენის შესწავლის საშუალება;
- დავნერგოთ შესაბამისი კვალიფიკაციის პედაგოგების გადამზადების ეფექტიანი მექანიზმი და რაც მთავარია, ქართული ენის სწავლა გავხადოთ უფასო 1+4 პროგრამის ფარგლებში“, – განაცხადა შორენა ლობჟანიძემ.