“სტრატეგია აღმაშენებლის” გენერალური მდივანი, პარლამენტის წევრი პაატა მანჯგალაძე პოლიტიკურ შეფასებას აძლევს სუს-ის უფროსისა და მმართველი პარტიის ლიდერების პრეტენზიებს აშშ-ს მხარისადმი, რომ მათგან არ იყო მოწოდებული კონკრეტული მტკიცებულებები ოთარ ფარცხალაძის ბრალეულობასთან დაკავშირებით:
“ჩემთვის უპასუხისმგებლო და აბსოლუტურად გაუგებარია “ქართული ოცნებისა” და სუს-ის უფროსის განცხადება, რომ ფარცხალაძესთან დაკავშირებით მოვითხოვეთ მტკიცებულებები და არ გვაძლევენო.
ეს კიდევ უფრო მეტი არაპროფესიონალიზმია ვიდრე ის, რომ ქართულმა სპეცსამსახურებმა ვერ გამოავლინეს წლების განმავლობაში რუსეთის ჯაშუში ფარცხალაძე და მასთან დაკავშირებული პირები. აშშ-ს ჰყავს 16 სპეცსამსახურისგან შემდგარი უსაფრთხოების თანამეგობრობა და თუ არცერთი არ გეთანამშრომლება ეს ნიშნავს, რომ არ გენდობა და არ გიმხელს იმ წყაროებს რომლებმაც გამოავლინა საქართველოში ფარცხალაძის ჯაშუშური საქმიანობა.
ასევე პრიმიტიული და დანაშაულებრივია ნარატივი, რომ თუ ამერიკა მტკიცებულებებს არ გვაწვდის ე.ი. ფარცხალაძე უდანაშაულოა და სულ ტყუილად დაასანქცირეს თურმე ის.
არ დაგვავიწყდეს, საუბარია საქართველოს ინტერესების წინააღმდეგ მოქმედ რუს ჯაშუშზე და იმდენად ჩამოშლილია ჩვენი სტრუქტურა რომ ჯაშუშის შესახებ ინფორმაციის გავრცელების შემდეგაც ვერ მოიპოვეს აგენტობის და ჯაშუშობის მტკიცებულებები მაშინ, როცა ყველაფერი ხელის გულზე დევს.
სინამდვილეში მთავარი პრობლემა არის ის, რომ გაშიფრულ აგენტ ფარცხალაძეს “ქართულ ოცნებაში” მყოფი გაუშიფრავი აგენტები არ და ვერ დასჯიან”, – აცხადებს პაატა მანჯგალაძე.
ინფორმაციას პოლიტიკური პარტია “გიორგი ვაშაძე – სტრატეგია აღმაშენებლის” საზოგადოებასთან ურთიერთობის სამსახური ავრცელებს
